Од ванкшныцятненень-тонавтницятненень пшкадемстэ, Артём Здунов тешкстызе: «Мельспаро евтамс тенк поздоровт астрономиянь коряс школасо тонавтницятнень ютксо весероссиянь олимпиадасонть эсь прянь вадрясто невтеманть кувалма! Те марканть минь кирдтяно уш аволь васенце ие. Евтан поздоровт, васняяк, тонавтыцятненень – те пек покш важодема. Ды тыненк, эйкакшт – тынь виевстэ молиде путозь тевентень ды топавтынк сонзэ! Течи минь прядтано химиянь коряс пелькстамонть – тешксэв, сон моли Мордовиясо».
Республикань Прявтось тешкстызе, Ероков эйкакштнень туртов лицеесь – ероков од ломантнень анокстамонь коряс флагман. Сон евтась сюкпря те важодеманть кисэ сонзэ прявтонтень Евгений Вдовиннэнь, тешкстызе, пек питней педагогической кадратнень кочкамось – тень эйстэ ламосо ашти цетавксось.
Эйкакштне евтнесть эсест арсемадост, ютавтозь олимпиадань пелькстамотнень эйстэ учоматнеде, евтызь эсест мелест-ванновтост ды макссть кевкстемат республикань Прявтонтень. Вера Меркулова кевкстсь: якась-арась олимпиадас школань иетнестэ региононь руководителесь. Артём Здунов евтнесь, сон сеедьстэ яксесь математикань, рузонь келень ды литературань, астрономиянь коряс олимпиадатнес – те пек эрявикс ды питней.
Астрономиянь коряс весероссиянь олимпиадань изницясь, 11-це классо тонавтницясь Илья Иляков арси молеме тонавтнеме «Прикладная математика и физика» енксонть коряс. Сон кевкстнесь: карми эрявикс-арась те енксось республикасонть сы шкасто. Мордовиянь Прявтось кемевтсь: «Региононь ламот предприятиятненень кармить эрявомо истят кадрат. Мордовиясо свал карми улеме тынк туртов важодема!»
43№ лицеень физикань ды астрономиянь тонавтыцясь Людмила Зуева евтась мель теемс республикасонть астрономиянь коряс кизэнь школа – те лезды явовтомс эйкакштнень мелест те предметэнтень. Артём Здунов кирдизе арсеманть, кармавтсь анокстамс яволявтома грантонь лезксэнть лангс Васенцетнень движениянть марто тематической сменань тееманть коряс.
Астрономиянь ды астрофизикань коряс Раськеютконь олимпиадасонть Россиянь командань руководителесь, Санкт-Петербургонь государственной университетэнь математико-механической факультетэнь небесной механикань кафедрань старшей преподавателесь Борис Эскин тешкстызе, маласо шкастонть Мордовиясо астрономиясь карми пек покш уровнясо - тень туртов улить весе условиятне. Ютазь олимпиадасонть республикань командась невтсь седе покш цетавкст масторонь пелеве енксонь прявтошонь команданть коряс. Сон истя жо евтнесь, сон аноксты зярыя научной проектт астрономиянь ды космонавтикань коряс, конатнень арси топавтомс минек республикасо.
«Мордовиясо пек вадря школа, тесэ превейстэ кирдить тонавтомань лувонть. Эйкакшт, кирдеведе эсь школантень, эсь республикантень! Мордовиясь тынк а стувтадызь!» – мерсь Борис Эскин.
Химиянь коряс школасо тонавтницятнень ютксо весероссиянь олимпиадань жюринь председателень полавтыцясь, М.В. Ломоносовонь лемсэ МГУ-нь химической факультетэнь деканось Сергей Карлов тешкстызе, Мордовиясто школасо тонавтницятнень цетавксост пек редявикст, сонсь олимпиадась анокстазель пек парсте.
Республикань лицеень химиянь тонавтыцясь Дмитрий Хлевин, сон ульнесь Саранскойсэ химиянь коряс олимпиадань меельце пельксэнь анокстамосонть ды ютавтомасонть, мерсь: «Истямо уровнянь пелькстамотнень ютавтомась – те покш честь, истя жо покш ответственность. Ламот регионтнэ теньс эйс а кундыть. Минек лицейсэнть теезь пек вадря условият, ды минь сынст нолдатано тевс!»
Вастовоманть лувсо евтазь эште вейке арсемась токшесь самай Республикань лицеенть юрсо естественной предметтнэнь коряс раськеютконь олимпиадатнесэ участиянть туртов Россиянь школасо тонавтницятнень национальной сборнойтнень анокстамонть. «Мелесь пек паро!» – кирдизе Мордовиянь Прявтось.
Вастовоманть прядовомга Артём Здунов арсесь школасо тонавтницятненень седеяк покш изнямот ды редявикс цетавкст эрямосонть ды явшесь ледстнемань казнеть.
Мордовия Республикань Прявтонь Пресс-службась