Те иень эйзюрковсто организациянтень топодсть 35 иеть. Мордовиянь Прявтось тешкстызе, Ветерантнэнь советэсь канды покш смусть региононть туртов ды теи покш путовкс од ломантнень тонавтомасо-превспутомасо. Кортасть Сурань рубежень строицятненень кеврунгонть ды музеенть тееманть коряс Военно-исторической вейсэндявксонть марто вейсэнь важодемадонть.
«Тынк превспутоматне лездыть миненек ламо прявт тевтнень топавтомсто. Башка мель течи, нама, эряви явомс од ломантнень тонавтомантень-превспутомантень, сенень, мезе моли школатнесэ. Интернетсэ ламо аволь алкуксонь кулят, секскак од ломантнень а эряви кадомс мельтеме», – тешкстызе Артём Здунов, вастовоманть панжомсто.
Мордовия Республикань Ветерантнэнь советэнь председателесь Иван Цыганок евтнесь, Мордовиянь ветерантнэнь организациясь – республикасонть сехте покштнестэ вейкесь, сонзэ юрсо 803 первичной организацият, 140 тежадо ламо ломанть. «Минек прявт тевесь – ветерантнэнень мелень явомась, республикань общественной эрямонтень сынст совавтомась, од ломантнень марто вейсэнь тевдеемась. Минек ветерантнэ – легедарнойть, эрьванть эйстэст эрямонь покш кизэ, истят невтевкстнэнь лангс нежедезь эряви кастомс -тонавтомс од ломантнень. Республикань руководствась свал кирди минек ушодкстнэнь. Те кенярдовты ды максы селмот – минь аноктано важодемс седеяк вадрясто!» – мерсь МР-нь
Ветерантнэнь советэнь председателесь.
Вастовомантень пурнавозетне кортасть Мордовиясо школасо тонавтницятнень ютксо кадетэнь движениянть виевгавтомадонзо. Кемекстазель мель одс ушодомс республикань патриотической мероприятиятнень ютавтоманть, конат лоткавтозельть пандемиянть шкасто.
Покш Березникень енксонь Ветерантэнь советэнь председателесь Пётр Прокин, Ине Отечественной войнань ветеранонь церась, пшкадсь региононь руководителентень Мордовиянь спортонь ветерантнэнь пельде арсема марто: вельмевтемс мелень явоманть шожда атлетикань спортонь мероприятиятнень ютавтомантень, конат кармить ветявомо сыре ломантнень ютксо. Сонсь Пётр Прокин – шожда атлетикань чиемань участник, неть пелькстамотне Покш Березникень енкссо ютавтовить 22-цеде.
Артём Здунов евтась сюкпря эрямонь вечкеманть кисэ ды кирдизе уш маласо шкастонть ветерантнэнь ютксо спортонь чемпионатонь ютавтоманть, истя жо тешкстызе, ней кортави ПФО-нь Шожда атлетикань коряс кубоктнень ютавтомань кевкстемась. Артём Здунов мерсь Пётр Прокиннэнь вейсэндявомс кевкстематнень кортамонтень, конат токшить Мордовиянь тренерэнь вейсэндявксонь тевдееманть.
Теньгушевань енксонь Ветерантнэнь советэнь председателесь Антонина Чалдушкина евтась сюкпря региононь руководителентень ветеранонь организациятненень лездамонть кисэ. Мерсь, эряви лездамс республикань районтнэсэ ветеранонь клубтненень, истя жо теемс важодемань таркат велетнесэ.
Саранскоень Николаевка поселкань ветеранонь организациянь председателесь Иван Таракин пшкадсь энялдома марто теемс эрямонь пунктсонть спортонь площадка.
Военно-космической вийтнень ветеранось Александр Подкатов тешкстызе од ломантнень марто важодемасонть истят мероприятиятнень, кода «Зарница», вельмевтемань, школатнесэ военно-патриотической лагерьтнень ютавтомань эрявиксчинть. Мордовиянь Прявтось тешкстызе, тедеде Мордовиясо арсеви ютавтомс военно-патриотической лагерень колмо сменат, конатнес пурнавить тежадо ламо од ломанть.
Меельцекс Артём Здунов мерсь, ветеранонь активенть марто истямо лувсо вастовоматне кармить ютавтовомо свалшкань лувсо, тешкстазь сы шкань важодемань аравтлувось. «Евтан весенень поздоровт весе раськень кенярксчинть – Изнямонь Чинть кувалма. Сюкпря, явтадо мель республикань эрямонтень ды ламо тейтядо од ломантнень – минек сы шканть – патриотизмань лувсо кастомантень».
Вастовоманть лувсо Артём Здунов явшесь покш наградат: Мордовия Республикань Почетонь Грамотат, «За личный вклад в развитие Республики Мордовия» Почетонь тешкст ды Мордовия Республикань Прявтонь Благодарностть.
Мордовия Республикань Прявтонь пресс-службась