Мордовиянь Прявтось Владимир Волков якшамковонь 28-це чистэ ульнесь ёроков од ломантненень казнень явшемань кенярксчинь промкссонть, конась ютавтовсь Республикань Кудонь Покш залсонть.
«Течи те залонтень пурнавсть сехте превей школань тонавтницятне ды студенттнэ. Монень мельспаро неемс, Мордовиянть вандынь чизэ кемевикс кедьсэ, тынк превей сельметнесэ ды ванькс прятнесэ, – тешкстызе республикань Прявтось. – Тынь, вечкевикс эйкакшт, минек виенек, кадрань прявт потенциалонок!»
Владимир Волков тешкстызе, Мордовиясо улить лезадмонь зярыя ёнкст, конат аравтозь минек од интеллектуальной элитантень лездамонть туртов. Истя жо раськеютконь ды весероссиянь предметэнь олимпиадатнесэ изницятненень явшевить премият. Тедеде лауреатокс кармасть 43 минек школасо тонавтницят.
«Башка эйкакштненень максовить зярыя премият. Невтемакс, Ёроков эйкакштнень туртов лицеень тонавтницясь Сулейман Казимов, конась изнясь физикань ды астрономиянь коряс Россиянь ды раськеютконь олимпиадатнесэ. Раськеютконь уровнясонть истя жо изнясть Лицеень тонавтницятне Кирилл Хайдуков, Алексей Кадыков, Руслан Антонов ды Илья Просяной, – тешкстызе В.Д.Волков. – Сулейман Казимов минек алкуксонь рекордсмен – сон уш колмоце ие изнясь Астрономиянь раськеютконь олимпиадасонть!
Превсэнзэ ды ёрокчисэнзэ сон изнизе эсензэ васенце миллиононть. Нама, ярмактне тесэ аволь прявтось. Мон кортан теде сеттненень, кие арси, буто а мереви получамс ярмкт эсь превтнень вельде. Мереви, тень туртов эряви ламо важодемс, ды свалшкане бажамс эсь прянь тонавтомантень!»
Теде башка, казнеть максозь 40 эйкакштненень, кить невтизь эсь пряст технической шкинемань пелькстамотнесэ, исследовательской тевдеемасонть, искусствасо, спортсо, волонтеронь движениясонть. Республикань ламо студентт изнить профессиянь мастерствань пелькстамотнесэ, «Worldskills» движениянь чемпионаттнэсэ.
«Мезесь эштё кенярдовты, те тематнень кочкамось, конатнень коряс минек школань тонавтництяне ютавтыть ванкшномат. Сынь кепедить неень шкань покш стакачить, бажить теемс од технологият, полавтомс масторлангонть вадря ёнов. Бути варштамс республикань Прявтонть казнензэ кисэ научно-технической шкинемань проекттнэнь лангс, – мерсь Владимир Волков. – Сонзэ лауреаттнэ ёвтыть мельть-арсемат отходтнэнь переработкань ды ведень ванськавтомань, эрямо кудотнень уштомань кисэ ютавкстнэнь киртямонь коряс, анокстыть «искусственной интеллектэнь», роботонь системат, «превей кудонь» макетт, станоконь модельть, бытовой газонь лисемань редямонь датчикть, чипаень батареят, электровелосипедт ды ламо мезе лия.
Эштё весть тешкстаса, неть важодематне аволь студентэнь, а школасо тонавтницянь. Ды аволь ансяк Саранскойстэ, истя жо республикань велетнестэ. Истя, Зубова-Полянань Жуковской школастонть, Орданьбуе ёнксонь Баеньбуень школастонть, Ташто Шайгова ёнксонь Од Акшинань ды Ташто Теризморгань школатнестэ, Краснослободскоень ёнкссо ошонь кавто школатнестэ ды Якстере Подгорань школастонть, Рузаевкасо ды Чаунзасо допобразованиянь куншкакуротнестэ.
Минек эйкакштнень весе неть проекттнэ ды изнявкстнэ невтить, республикасонть образованиянь качествась – масторонь келес сехте вадрятнестэ вейкесь. Ды минь поладтанок лездамо ёроков эйкакштненень. Лия ёнов а молиця возможность тень туртов панжи «Образование» раськень проектэсь».
Мордовиянь Прявтось тешкстызе, Россиянь Президентэсь В.В.Путин Кучомасонть кармавтсь нежедемс эрьва эйкакшонть ёрокчинзэ редямонтень ды виевгавтомантень. «Тень туртов панжовить эйкакшонь технопарктне, технической кужинетне ды куншкакуротне, – ледстизе сон. – Республикасонть теезь эйкакшонь васенце мобильной технопарк, конась карми важодеме районтнэсэ. Тедеде арсеви панжомс эйкакшонь технопарк «Кванториум» Рузаевкасо, кавто иетнень перть рамамс эштё 2 мобильной технопаркт».
Тешкстасынек, мелят панжозь «Мира» эйкакштнень шкинемаст редямонь ды виевгавтомань куншкакурось. Сонзэ важодемасо нолдавить тевс «Сириус» сочинь куншкакуронть методикатне. Мордовиянь университетсэ ушодызе важодеманзо Дианов академикенть лемсэ наукань коллаборациянь кудось, косо 400 эйкакшт уш важодить проекттнэнь лангсо. 2022 иестэ эйкакшонь наукань истямо жо кудо панжови М.Е.Евсевьевень лемсэ педагогической институтонть пингстэ. «Бути а ули научно-технической, инженерэнь образования, а тееви эскелькс икелев, – мерсь Владимир Волков. – Текень пингстэ минь бажатанок теемс истят жо неень шкань условият эйкакштнень шкинемасо тевдееманть туртов. 2024 иентень Мордовиясо одкстомтовить-вадрялгавтовить сехте аламо 12 эйкакшонь искусствань школат, нилетне уш тедеде (Саранскойсэ, Рузаевкасо, Чаунзасо ды Орданьбуесэ). Сынст туртов рамазь 200 музыкань инструментт ды мультимейдийной оборудования».
Мордовиянь Прявтось истя жо тешкстынзе эйкакштнень, кить невтизь республиканть шкинемань эрьва кодат пелькстамотнесэ. «Вейкенть морамонзо кунсолось весе масторось. Те Артемий Хрущалин вокалистэсь, сонензэ удалась лисемс «Синяя птица» весероссиянь телевизионной пелькстамонь финалс. Ды минь арсетянок Артемийнень, кода минек весе од музыканттнэнень, артыцятненень ды артисттнэнень шкинемасо касома!» – мерсь сон.
Владимир Волков башка тешкстызе историянь ледстнематнень ванстомань эрявиксчинть. «Пазось, тетяне-аватне, тынк тонавтыцянк ды превс путыцянк казидизь тынк превсэ, вадря содамочисэ ды, мезесь сехте прявт, мельсэ вадря кирдемасо. Те тынк маштомачинть эйстэ ламось карми аштеме сы шкастонть. Секс мекс самай тыненк эряви ванстомс покштятнень-бабатнень ине тевест коряс ледстнематнень, Ине Изнямодонть алкуксчинть, сонзэ 75 иетнень минь тешкстатанок тедеде, – мерсь сон. – Тынк покштянк, бабанк бажасть вейкентень – сынст эйкакшост ды нуцькаст эряст оля масторсо. Минь мартонк каштансто кепедезь пря марто ютавлинек икелев.
А эряви стувтнемс тень коряс, чарькодемс тень аволь ансяк превсэ, истя жо марямс седейсэ.
Кода невти эрямось, войнась прядовсь ансяк номинальна. Минек яттнэ поладыть сонзэ лия лувсо. Самай тынь, апак вано аламо иетнень лангс, аштетядо икеле. Секс мекс Интернетсэ, социальной сетнесэ ветяви кампания минек историянть полавтомга, од превтнень кисэ бороцямо.
Секскак кирдеде мельсэнк, эрямосонть часиясь а онкстави «лайктнесэ» ды соцсетнесэ виртуальной ялгатнесэ. Покш питне максодо сеттненень, кие маласо, тынк алкуксонь ялганк ды малавиксэнк туртов. Илядо стувтне «живой кортамотнеде» ды свалшкань питнейчитнеде, конатнень ютксо сэтьмечись, вечкемась, парось ды минек Ине Изнямось!
Ёвтан сюкпря тетянк-аванк ды тонавтыцянк туртов. Покш сюкпря истят редявикс, ёроков эйкакштнень кисэ!
Вечкевикс эйкакшт! Арсян тенк валдо мельть, мельстуиця тевть ды од панжомат!
Изнявкст тенк тонавтнемасо ды весе ушодкссонк!»
Вастовомантень пурнавозетне ёвтасть сюкпря республикань руководствантень ды башка МР-нь Прявтонтень Владимир Волковнень од ломантненень весемеёндонь лезксэнть, мелень явоманть ды кастоманть-тонавтоманть кисэ.
Те чистэнть явшевсть ярмаконь премият ды казнеть Мордовиянь Прявтонть пельде, тетятненень-аватненень ды тонавтыцятненень – цецянь пусмот.
Тешкстасынек, те чистэнть явшезь республикань научно-технической ды художественной шкинемань, учебно-исследовательской тевдеемань изницятнень ды лауреаттнэнь дипломтнэ, истя чествовазь весероссиянь ды раськеютконь (масторлангонь) олимпиадань изницятне ды призертнэ.
Истя, МР-нь Прявтонть Указонзо коряс 2019 иень итогтнень коряс Лауреатонь дипломсо ды премиясо казезь Ёроков эйкакштнень туртов республикань лицеень тонавтницятне – школасо тонавтництянень регионъютконь (масторлангонь) олимпиадань изницятне ды призёртнэ.
Руслан Антоновнень максозь премия 200 тёжат целковоень покшолмасо IAO (Румыния-2019) Раськеютконь астрономиянь олимпиадасонть казнень тарканть кисэ. IAO (Румыния-2019) Раськеютконь астрономиянь олимпиадасонть 300 тёжат целковоень покшолмань премиясо ды IOAA (Венгрия-2019) Астрономиянь ды астрофизикань раськеютконь олимпиадасонть сиянь медаленть кисэ 200 тёжат целковоень покшолмань премиясо казезь Сулейман Казимов. IJSO (Катар-2019) Раськеютконь естественнонаучной олимпиадасонть сиянь призёрось Илья Просяной казезь премиясо 200 тёжат целковоень покшолмасо, Кирилл Хайдуков – IAO (Румыния-2019) Раськеютконь астрономиянь олимпиадасо изницясь казезь премиясо 300 тёжат целковоень покшолмасо.
Каземань церемониянть прядовомга, «Синяя птица» од талантнэнь Весероссиянь панжадо пелькстамонь финалистэсь, Саранскоень 20№ гимназиянь тонавтницясь Артемий Хрущалин морась пурнавозетненень «Небо» моро.