Мордовиянь Прявтось Владимир Волков ожоковонь 27-це чистэнть ютавтсь важодемань вастовома «Норов» агрохолдингень прявтонть Александр Поздняков марто. Кортамось мольсь те иестэ компаниянь группатнень важодемань невтевкстнэде ды Кочкурбуень ёнкссо велень хозяйствань производствань седе тов виевгавтомань коряс арсематнеде.
Александр Поздняковонь валонзо коряс, 9 ковтнень перть компаниятнень группань тевдеемань весе ёнкстнэсэ невтевкстнэ вадрят: кассь ловсонь, сывелень, колбасонь производствась.
«Зяро те иестэнть потявтадо вейке скалонть пельде – 10,5 тёжат килот? Те вадря невтевксэсь», - тешкстызе Владимир Волков.
Эрьва ие агрохолдингесь покшолгавты индейкань производстванть – таштамковсто республикань Прявтось ульнесь предприятиясонть ды ваннызе производствань од корпустнэнь строямонть, сынь панжовить 2021 иень васенце кварталстонть ды лездыть агрохолдингентень покшолгавтомс индейкань производстванть 3 тёжат тоннань видьс.
«Ней зяро нолдатадо?» - кевкстсь Владимир Волков.
«Ней 2,5 тёжат тоннат, ломантне рамить вадрясто, микшнетянок Мордовиясо ды лия регионтнэсэ», - мерсь Александр Поздняков.
Производствань келейгавтоманть вельде теевить важодемань од таркат – 9 ковтнень перть теезь 35.
«Производствань од площадкатне – те велесэ важодемань од таркат. Миненек те пек эряви, секскак минь карматанок явомо весемеёндонь лезкс республикань ёнкстнэсэ инвестициняь проекттнэнь топавтомантень», - мерсь Владмир Волков.
Агорохолдингесь яви лезкс райононь социальной ёнксонтень. Истя, тедеде «Норовось» 14 млн целковойде ламо явсь «Вечная память защитникам Отечества» мемориальной комплексэнь путомантень, истя жо Семилей велесэ Николай Чудотворецэнь храмонть ды иневанькс источникенть одкстомтомантень.
Важодемань вастовоманть лувсо республикань Прявтось истя жо кирдизе агрохолдингень тевдеемань од ёнксонть – туризмань виевгавтоманть. Кода пачтясь Александр Поздняков, неень шкане анокстави Кочкурова ёнксонь Карнаень водохранилищань перька тарканть виевгавтомань коряс бизнес-план. Тосо арсевить теемс оймсемань таркат покштнень ды вишкинетнень туртов, те лезды тердемс Мордовияв туристт лия регионтнэстэ.
Мордовия Республикань Прявтонть пресс-службась