Мордовиянь Прявтось Владимир Волков ульнесь Од ломантнень ютксо фигурной кирякстнемань коряс Россиянь первенствань панжомасонть, конась даволковонь 6-це чистэ ютавтовсь Саранскоень Эень дворецсэнть.
Региононь руководителесь ёвтась поздоровт весе пелькстыцятненень ды ваныцятненень масторонь спортонь эрямосонть редявикс тевенть коряс, истя жо шумбракстнесь эень аренасонть покш инжетнень марто – Россиянь Фигурной кирякстнемань федерациянь президентэсь, олимпийской чемпионось Александр Горшков, Федерациянь генеральной прявтось Александр Коган ды СССР-нь ды Россиянь заслуженной тренерэсь Елена Чайковская.
«Минек туртов покш каштанчи, Саранскоесь ловови фигурной кирякстнемань Россиянь пряв куншкакуротнестэ вейкекс», – мерсь Владимир Волков.
Мордовиянь прявтошов састь малав сядо виев од спортсмент – Россиянь фигурной кирякстнемань вандынь чись. Пелькстыцятнень ютксо – масторлангонь покш турниртнэсэ изницятне. Турнирэнтень башка смусть максы се, тесэ изницятнень эйстэ пурнави од ломантнень ютксо масторлангонь чемпионатонтень Россиянь сборноесь, пелькстамотне ютавтовить те иень эйзюрковсто Таллинсэ.
Мордовиянь Прявтось тешкстызе, фигурной кирякстнемась вечкеви республикань эрицятненень. Эень дворецтэнть башка Мордовиясо важодить 8 вельтязь эень аренат.
«Курок эштё вейке, неень шкань арена карми улеме Саранскоень Универсальной залсонть. Сонзэ трибунатнес кармить кельгеме 8 тёжат ломанть. Ды минь покш мель марто одс карматанок учомо тынк Мордовиянь прявтошсо!» – пшкадсь пуромозетненень Владимир Волков.
Республикань Прявтось арсесь ваныцятненень вадря мельть, пелькстыцятненень – виде бороцямо, покш изнявкст ине Россиянть лезэс. «Кадык саранскоень эесь канды тенк уцяска!» – пшкадсь спортсментнэнень Владимир Волков.
Россиянь фигурной кирякстнемань федерациянь президентэсь Александр Горшков тешкстызе, Саранскоень эень аренась макссь ушодкс ламот од спортсменттнэнень, конат мейле кармасть масторлангонь ды европань спортонь пелькстамонь призёрокс ды изницякс, истя жо олимпийской чемпионокс. Александр Горшков тешкстызе Мордовия Республикань Прявтонть Владимир Волковонь ды региононь Правительстванть фигурной катаниянь виевгавтомантень покш путовксонть.
Тешкстасынек, пелькстамотне ютавтовить Саранскойсэ даволковонь 4-8-це читнестэ, Эень дворецэнь аренантень лисить 2019-2020 иетнень сезононь од ломантнень ютксо фигурной кирякстнемнаь коряс ISU Гран-принь финалонь изницясь Камила Валиева, Гран-принь финалонь бронзань призерось Дарья Усачева, Гран-принь юниоронь сериянь финалонь сиянь призёрось Андрей Мозалев, 2020 иень од ломантнень Олимпийской налксемань бронзань призёрось Даниил Самсонов, од ломанень Олимпиадань спортивной паратнень ютксо изницятне Аполлинария Панфилова ды Дмитрий Рылов.
Мордовиянть пелькстамотнесэ невти конькасо фигурной кирякстнемань коряс СШОР-нь воспитанникесь Артем Тимакин.
Мордовия Республикань Прявтонть пресс-службась