Владимир Волков тешкстызе, сон пштистэ ваны масторонь кадрань прявт пелькстамонь весе этаптнень мельга, сонзэ участниктнень ды изницятнень мельга. «Нама, сехте покш мель явтанок Мордовиянть пельде участниктненень. «Лидеры России» пелькстамонь прявт смустезэ – перспективной руководительтнень редямось ды сыненст лезэнь явомась. Монь ванновтон коряс, прявтокс ашти сеяк, эрьва участникесь пурны покш опыт ды виевгавтомань туртов од возможность», – тешкстызе республикань Прявтось.

Мелят Мордовиясь совась васенце кемень регионтнэнь юткс «Лидеры России» пелькстамонь участниктнень ламолгадомаст коряс, пелькстамонь финалс ютась республикань вейке представителесь. «Тедеде пелькстамонтень тешкставсть малав 1600 ломанть. Те тевентень эрязасто кундасть муниципальной уровнясояк, республикань райононь ды велень эрицятне», – мерсь региононь руководителесь.

Вастовоманть лувсо истя жо тешкстазель, Россия – страна возможностей» платформань проекттнэ, конатне топавтовить Россиняь Президентэнть мелензэ коряс, явовтыть од ломантнень мелест. «Минек волонтертнэ ды студентэнь отрядтнэ лиснесть изницякс «Лига вожатых» ды «Доброволец России» весероссиянь пелькстамотнесэ. Республикасонть минь эрязасто вешнетянок ёроков од ломанть государственной службасо важодеманть туртов, кадрань резервас сынст совавтомга, сыця кочкамотнесэ улемга», – тешкстызе Мордовиянь Прявтось.

Пелькстамонь участниктне ёвтнесть региононь руководителентень важодемань ды общественной тевдеемадост, пачтясть сы шкантень аравтлувдост, проекттнэнь топавтомань анокчидест.

«Тынк лангс ванозь, мон чарькодян, тедеде минек потенциалось седе покш, ды минь учотано Мордовиянть пельде пелькстамонь седе ламо финалистт. Ды бути тынк улить мелсьтуиця меленк-арсеманк ды проектэнк, конат эрявикст республикантень, минь анокт сынст ванномс ды явомс лезкс», – мерсь ваствоманть прядовомга Владимир Волков.

Мордовия Республикань Прявтонть пресс-службась