Мордовиянь Прявтось Владимир Волков ёвтась поздоровт республикань парламентарийтненень МР-нь Государственной Собраниянтень 25 иетнень топодемаст кувалма

Мордовиянь Прявтось Владимир Волков ёвтась поздоровт республикань парламентарийтненень МР-нь Государственной Собраниянтень 25 иетнень топодемаст кувалма

Мордовиянь Прявтось Владимир Волков ульнесь МР-нь Государственной Собраниянь котоце тердемань 49-це сессиясонть, конась алтазель республикань высшей законодательной органонтень 25 иетнень топодемантень.

В.Д.Волков, поздоровонь ёвтамсто тешкстызе, Мордовиянь Госсобраниясь теевсь минек масторонь историянь стака шкастонть, республикаоснть аволь шожда тевтнень пингстэ.

«Эрямось вешсь полавтомат. Васняяк, весе уровнятнесэ эрявсь кемекстамс виев ды лезэнь кандыця власть, велявтомс ломантнень ёмавтозь кемемаст, – ледстизе МР-нь Прявтось. – Те ёнкссо прявт эскельксэкс кармасть Государственной Собранияс кочкамотне».

Мордовиянь властень прявт законодательной од органось пурназель 1995 иень якшамковсто. «Самай сестэ республикань прявтонтень сась ве мельсэ аштиця командась, конань ветясь икелев вейкине мелесь – вельмевтемс тиринь республиканть, лездамс ломантненень вадрясто эрямс ды важодемс, – тешкстызе Владимир Волков. – Государственной Собраниянь васенце сессиястонть кемекстаезль решения анокстамс минек республикань прявт закононь проектэнть – Мордовиянь Конституциянть, конань лангс нежедезь минь эрятанок ды важодтянок весе неть иетнень перть. Истя, 1995 иень якшамковонь 24-це чистэ ушодовсь покш важодемась, конась топавтови республикасонть уш 25 иетнень перть».

МР-нь Прявтонть валонзо коряс, Мордовиянь касомань-кепетемань од шкась тешкстазь редявикс изнямотнесэ. Республикась алкуксокс полавтовсь, кармась инновациянь экономиканть ды промышленностенть, икеле молиця велень хозяйстванть, сюпав культура марто неень шкань регионокс.

«Нама, минек вейсэнь изянвкстнэсэ покш таликаст Государственной Собраниянь депутаттнэнь. Неть иетнень перть примазь законтнэ тейсть кеме юр Мордовиянь социально-экономической виевгавтомантень, правопорядоконть кемекстамантень, государственной властень ды местной самоуправлениянь органтнэнь лезэвстэ важодемантень, – тешкстызе В.Д.Волков. – Течи пшкадян сюкпрянь лембе вал марто весенень, кить ульнесть Мордовиянь Государственной Собраниянь депутатокс. 25 иетнень перть те статусось максозель 208 ломантненень. Вейкесь юткстост – Юрий Васильевич Тутуков – ульнесь весе кото тердематнень депутатокс.

Госсобраниянть историязо сюмавозь сеть лемтнень марто, кить ульнесь Мордовиянь законодательной властень органонть прявтсо. Те Николай Иванович Меркушкин, Валерий Алексеевич Кечкин, Валентин Васильевич Конаков. Кавто меельце тердематнесэ Государственной Собраниясь лезэвстэ важоди Владимир Васильевич Чибиркинэнь прявтсо.

Сюкпрянь валт истя жо ёвтан Госсобраниянь Аппаратонь весе важодицятненень ды ветерантнэнень».

Кода тешкстызе Владимир Волков, республикасонть парламентаризмань историясь сюпав депутаттнэнь лезэв важодемасост кода заседаниянь залсонть, истя жо таркатнесэ – эсь округтнэсэ, участкатнесэ, оштнесэ ды велетнесэ ломантнень марто вастовоматнесэ.

«Весе неть иетнень перть депутаттнэ лезэвстэ важодсть республикань законодательной юронть одкстомтомань коряс, тейсть правань кеме юр республикань виевгавтомань прявт кевкстематнень витемантень, – мерсь МР-нь Прявтось. – Течи Мордовиясо кемекстазь ды федеральной центранть марто вейсэ топавтови виевгавтомань покш программа. Сонзэ юрсо – нацпроекттнэнь топавтомась, конатнень яволявтынзе Россиянь Президентэсь. Тешкстаса, Мордовиянь неень шкань историясонть башка таликазо Россиянь Федерациянь Президентэнть Владимир Владимирович Путинэнь.

Сонзэ лезксэнзэ вельде строязь республикань промышленной ламот предприятиятне, социальной сферань объекттнэ. Владимир Владимирович ульнесь мартонок, зярдо минь тешкстынек Эрзянь-мокшонь раськенть Россиянь лия раськетнень марто вейсэндявомань тежа иетнень. Президентэнть мелензэ коряс Саранскоесь совавтозель футболонь коряс масторлангонь чемпионатонь оштнень-организатортнэнь юткс.

Минек ушодкстнэнь кирдемаст кисэ истя жо ёвтатанок сюкпря властень федеральной органтнэнень, минек туртов пек питней Россиянь Правительстванть, Федерациянь Советэнть ды Государственной Думанть, истя жо масторонь регионтнэсэ законодательной органтнэнь марто вейсэнь важодемась».

Теде башка, те иень прявт тевекс кармась Россиянь Федерациянь Конституцияс полавтоматнень совавтомась. Весероссиянь вайгелень максомась панжсь од пелькс масторонь историясонть, кемекстынзе вадря ёнов весе полавтоматнень, конат лиссть Россиясо меельце иетнестэ.

«Конституцияс полавтоматнень совавтомась – те важодиця ломантнень ды пенсионертнэнь, од ломантнень ды эйкакш марто семиятнень туртов социальной гарантиянь од уровня. Те социальной видечинь государствань строямонь лув, косо эрямось, шумбрачись – прявт питнейчитне, – тешкстызе Владимир Волков. – Ледстяса, Весероссиянь кочкамосонть республикань эрицятне кирдизь Россиянь Президентэнть ушодксонзо. 79% явканть пингстэ Конституцияс полавтоматнень кисэ вайгелест максызь Мордовиянь 85% кочкицятне.

Ней эряви ванстомс минек вейкетьксчинть. Течи карматанок ванномо закононь проект Мордовия Республикань Конституцияс зярыя полавтоматнень совавтомадо. Сынь аравтозь республикань законодательстванть одкстомтомантень, Россиянь одкстомтозь Конституциянь норматненень ды положениятненень ладямга.

Кеман, депутаттнэнь вадря койтнень ды сюпав опытэнть, кризисэнь шкатнень печтемань минек маштомачинть лангс нежедезь минь топавтсынек весе арсематнень. Масторонть марто вейсэ поладсынек икелев молеманть.

Эштё весть ёвтан поздоровт Мордовия Республикань Государственной Собраниянтень 25 иетнень топодеманть кувалма! Седейшкава арсян тенк изнявкст тиринь Мордовиянть ды эрьва эрицянть лезэс!»

Теде башка, республикань парламентарийтненень поздоровт ёвтасть МР-нь Госсобраниянь Председателесь Владимир Чибиркин, Россиянь Федерациянь Федеральной Собраниянь Федерациянь Советэнь сенаторось Владимир Литюшкин, «Совет муниципальных образований Республики Мордовия» ассоциациянь председателесь Вячеслав Цыбаков. Мордовия Республикава Прявт федеральной инспекторось Михаил Сезганов ловнызе Равчирень федеральной округсо РФ-нь Президентэнть полномочной представителенть Игорь Комаровонь приветственной адресэнть.

Парламентарийтненень явшезь государственной покш казнеть.

Сессиянть лувсо совавтозь полавтомат Мордовиянь Конституцияс. МР-нь Прявтонть Администрациянь законодательствань ды правовой экспертизань кевкстематнень коряс управлениянь прявтонь полавтыцянть Олег Зиновьевень валонзо коряс, Мордовиянь Прявтось совавтсь закононь проект, конань коряс МР-нь Конституциясь тееви ладицякс Россиянь Конституциянтенть, Весероссиянь кочкамотнень шкасто кемекстазь полавтоматнень мельсэ кирдезь.

Сессиянть лувсо ванновсть лия кевкстематкак.