Мордовиянь Прявтось Владимир Волков кучсь седеймарямонь вал марто телеграмма Санкт-Петербургонь губернаторонтень Георгий Полтавченконень. Телеграммасонть пачтяви:
«Мельвановикс Георгий Сергеевич!
Мордовиянь эрицятне тынк ды весе Россиянть марто вейсэ печтить седейризкс Санкт-Петербургсо метрополитенсэ сезевеманть вельде ломантнень чавовомаст коряс. Те минек вейсэнь сэредькс, покш зыян, а ёвтавикс ризкс. Республикань весе ломантнень ды эсень пельде ёвтан седеймарямо чавовозтнень малавиксэст туртов».
Сезевемась ульнесь апрелень 3-це чистэ «Технологический институт» ды «Сенная площадь» петербургонь метронь станциятнень ютксо поездэнь вагонсо. Национальной антитеррористической комитетэнть пачтямонзо коряс, чавовсь 11 ломань ды 45 ломанть эрьва кодамо томбавкс марто пачтязь больницяв.