Мордовиянь Прявтось Владимир Волков якшамковонь 27-це чистэ ютавтсь промкс здравоохранениянь первичной звенань важодемань вадрялгавтоманть коряс. Ледстясынек, те тевенть путызе Россиянь Президентэсь Федеральной Собраниянтень Кучомасонзо. Первчиной звенань одкстомтомнаь программась нолдазь тевс ютазь иень медьковонь 1-це чистэ, эрявить витнемс масторонь весе регионтнэстэ поликлиникатнень, райононь больницятнень, лезэнь куроксто явомань станциятнень, рамамс оборудования. Неть тевтнес башка явозь 550 миллиард целковойть, 90 ламо проценттнэ – те федеральной ярмакт.
Мордовиясо од программантень эрявить 14,7 млрд. целковойть. 10,8 млрд. целковойть арсевть ютавтомс больницятнень ды поликлиникатнень строямс ды педе пев витнемс, 2,7 млрд. целковойть – медицинань оборудованиянь рамамс, 470 млн. целковойть – транспортонь рамамс, 335 млн. целковойть ютавтовить отраслянь цифровизациянтень.
Прявт тевесь, кода тешкстызе Владимир Волков, – те велень эрицятнень туртов медицинань лезксэнь доступностенть кастомась. Кортамось моли кода транспортонь доступностенть, истя жо райононь больницятнень ды ФАП-нь медицнинань кадрасо пештеманть коряс. Президентэнть кармавтомазо – ламолгавтомс уш те иестэнть медицинань специальностнень коряс целевой бюджетэнь таркатнень лезды топавтомс велень больницятнень эрявикс врачтнесэ.
Первичной звенань одкстомтомань программанть лувсо арсевить строямс ниле покш объектт: те Рузаевкасо эйкакшонь поликлиникась, Саранскойсэ покштнень туртов поликлиникась, Ицялкасо поликлиникась ды Краснослободскойсэ стационарось ды поликлиникась.
Покш ярмакт ютавтовить ФАПнь строямс ды тов медицинань оборудованиянь рамамс.
Теде башка, Мордовиянь Прявтось кармавтсь республикань Минздравонтень явомс башка мель васоло велетнесэ скорой помощтнень важодемаст лангс. «Неть велетнес тердематнес ардост реанимобильть, косо ули экстренной медицинань лезксэнь явоманть туртов эрявикс весе оборудованиясь, «скоройтнень» бригадасонть улест покш квалификациянь специалистт», – тешкстызе Владимир Волков.
Промкссонть истя жо кортавсть лекарствасо топавтомань кевкстематне.
Мордовия Республикань Прявтонть пресс-службась