Мордовиянь Прявтось Артём Здунов аштемковонь 9-це чистэ Московсо РАНХиГС-нь площадкасонть кортась региононь командатнень туртов тонавтомань программасонть спикерэкс, конань ютавты Од ломантнень тевест коряс федеральной агентствась.
Программань смустесь - од ломантнень политикань енкссо управлениянтень улиця ёнкстнэнь полавтомась, истя жо ведомстватнень ютксо вейсэнь важодемань виевгавтомась.
«Од ломантнень политикась - прявт ёнкс, прявт тев, - тешкстызе Мордовиянь Прявтось. - Те лувонть нолды тевс республикань весе командась, Правительствань весе члентнэ - сынь весе аравтозь важодемасо истямо лувонтень».
Мордовиясь эрязасто важоди федеральной коллегатнень марто: Од ломантнень тевест коряс Федеральной агентстванть, «Васенцетнень Движениянть», «Юнармиянть», Россиянь Поисковой движениянть, «Больше, чем путешествие» АНО-нть, Волонтеронь куншкакуротнень ассоциациянть, «Добро.РФ» ресурсонь куншкакуронть, «Защитники Отечества» Государственной фондонть, «Знание» Россиянь обществанть марто. Мелят весероссиянь пелькстамосонть изнямонть вельде республикасонть теезь «Семейная академия «Вместе» од ломанень тонавтомань иень перть важодиця куншкакурось. Уш медьковсто Мордовиясь карми весероссиянь кавто покш мероприятиятнень туртов площадкакс: «Больше, чем путешествие» семиянь туристэнь фестивалентень ды «Родные – Любимые» семиянь форумонтень.
Республикасонть ладязь свалшкань важодема од семиятнень марто. Прявт ёнкстнэнь ютксо - рамавиця эрямо таркась, од, студентэнь ды ламо эйкакшонь семиятнень туртов корпоративной стандарттнэнь ды лездамонь од тевтнень тевс нолдамось. Покш мель явови корпоративной демографической стандартонь тевс нолдамонтень - тень туртов предприятиятнесэ теевить од ломанень советт, тевензэ топавты важодиця од ломантнень региононь советэсь.
Те иень прявт проектэсь – «Семейная столица России» весероссиянь пелькстамось, сонзэ кирдизе Россиянь Федерациянь Президентэсь Владимир Путин. Семиянть лангс нежедиця сехте вадря практикатне, конатненьу невтсызь участниктне, лездыть кемекстамс весе масторонь регионтнэсэ семиянь политикань од стандарт.
Тонавтомань программань участниктнень пельде састь ламо кевкстемат Мордовиянь Прявтонтень - аволь ансяк кода региононь руководителентень, истя жо Госсоветэнь «Семья» ёнксонть коряс комиссиянь председателентень. Артём Здунов кемевтсь: од ломантнень марто важодемань коряс региононь специалисттнэнь пельде мельтнень-арсематнень сайсызь важодемас.
Мордовия Республикань Прявтонь Пресс-службась