Ледстясынек, форумось ютавтови РФ-нь Президентэнть кармавтоманзо коряс ды аравтозь од ушодкстнэнь вешнемантень, конатнень вельде тееви покш путовкс масторонь кастомантень-кепетемантень ды 2030 иенть самс национальной тевтнень топавтомантень.
«Агентство стратегических инициатив» АНО-нь регионтнэнь марто важодемань куншкакуронь проекттнэнь прявтось Олег Шевкунов евтнесь региононь пельксэнь ютавтомадонть. Мельтнень-арсематнень пурнамось ушодовсь даволковонь 22-це чистэ ды карми молеме чадыковонь 22-це чинть самс, теде мейле кочкавить 1000 сехте вадрятне. Форумонь очной мероприятиятнень арсеви ютавтомс те иень медьковсто. Сеть проекттнэнень, конатнень кочкасызь эксперттнэ, явови АСИ-нь, виевгавтомань ды бизнесэнь институттнэнь, истя жо властень федеральной ды региононь органтнэнь пельде лезксэсь. Сехте вадря мельтне-арсематне пачтявить государствань прявтонтень.
МР-нь Экономикань, микшнемань ды предпринимательствань министрась Алексей Грибанов пачтясь, мельтнень-арсематнень пурнамось ветяви од ломантнень ютксо, тонавтомань организациятнесэ ды бизнес-вейсэндявкстнэсэ, властень ды местной самоуправлениянь органтнэнь лезксэст вельде. Региононь мельтне-арсематне токшить од ломантнень профориентациянть, вишка ды средней предпринимательстванть ды эсь тевест ветицятнень туртов бизнес-климатонь вадрялгавтоманть, социальной сферань виевгавтоманть.
«Кеман, Мордовиясь анок евтамс мельть-арсемат, конат улить лезэвекс аволь ансяк республиканть, истя жо нолдавить тевс масторонть келес», – мерсь Артём Здунов.
Мордовия Республикань Прявтонь пресс-службась