Тосо ульнесть Мордовиянь пельде сенатортнэ ды депутаттнэ, масторонь субъекттнэсэ землячестватнень ды раськень-культурань автономиятнень руководительтне, региононь ведомстватнень ды общественной вейсэндявкстнэнь руководительтне.
«Миненек эряви ютавтомс покш мероприятия Россиянь регионтнэнь марто вейсэ – те «Мы вместе!» раськень культурань од ломанень фестивалесь. Минь каякшнынек грант, конась кирдезь. Истя жо минь анокстатано «Молодежь в этнокультурном пространстве: реальность и перспективы» финнэнь-угрань раськетнень весероссиянь II форумонтень. Кортамось моли тевтнень-илатнень ковкерьксэнть кемекстамодонзо, минек туристэнь потенциалонть шаштомадонзо, ды, нама, ошонь весе таркатнень анокстамодост», – мерсь республикань руководителесь.
Мордовиясь карми «Мы вместе» од ломанень фестивалень куншкакурокс, конась ютавтови ниле прявт таркатнесэ: Советской площадьсэнть ды фонтанонь валгомасонть, «Мордовия Арена» стадионсонть, А. С. Пушкинэнь лемсэ культурань ды оймсемань парксонть ды Тежа иень площадьсэнть. Финнэнь-угрань раськетнень форумонть туртов прявт таркакс кармить «Мордовия Арена» стадионось ды Н. П. Огарёв лемсэ МГУ-сь. Мордовиясо весероссиянь сыця покш мероприятиятнень ютавтомань лувонть коряс пачтясь МР-нь Правительствань Председателень полавтыцясь Галина Лотванова. Тевтнень-илатнень ковкерьксэнтень совить раськень культуратнень фестивалесь, Мордовиянь брендтнэнь картась, дегустациятне, мастер-класстнэ, «Поющее дерево» раськень промыслатнень ды ремеслатнень регионъютконь фестивалесь, «За Победу» панжадо менеленть ало музеесь, «Шумбрат» раськень-фольклоронь кенярксчись, Россиянь раськетнень спортонь фестивалесь ды ламот лият. Омбоце чистэнть Россиянь шкинемань коллективтне молить муниципальной районтнэс, теевить содавиксэкс Мордовиянь койтнень-кирдатнень марто, ладить ялгаксчинь ды шкинемань сюлмот. Финнэнь-угрань раськетнень форумонь участниктнень туртов арсеви ютавтомс секциянь занятият.
Тешкстазель, фестивалень площадкатне кармить важодеме истя: од ломантненень мереви кочкамс сынст туртов мельстуиця енкстнэнь ды пурнамс од содамочить-ерокчить. «Мы вместе!» раськень культурань весероссиянь од ломанень фестивалесь карми Россиянь шкинемав од ломантнень туртов алкуксонь «виень таркакс».
Неть читнестэ Мордовияв пурнавить шкинемань коллективть масторонь весе регионтнэстэ, «Мы вместе» фестивалень малав 800 участникть, 400 – финнэнь-угрань раськетнень форумонь, 150 кедьчелькев ломанть, мероприятиятень 50 тежадо ламо участникть ды ваныцят.
«Од ломантнень кевкстематнеде ней эряви кортамс кода зярдояк икеле. Неть мероприятиятнень прявт темась – кода неень шкане ладямс воспитаниянь-патриотизмань важодеманть. Форумсонть примить участия 50 ламо регионт. Саранскоесь карми кортамонь площадкакс, косо тешкстави раськень ды од ломанень государственной политикась», – тешкстызе РФ-нь Федерациянь Советэнь сенаторось, Россиянь Финнэнь-угрань раськетнень ассоциациянь председателесь Петр Тултаев.
Мордовия Республикань Прявтонь пресс-службась