Россиянь-Китаень ялгаксчинь обществась важоди 1957 иестэ саезь. Те шканть перть сон кармась лидерэкс Россиянь ды Китаень ютксо публичной ды народной дипломатиянть виевгавтомасо. Ламот мероприятиятне, конатнень ютавты общественной организациясь, аравтозь кавто масторонь раськетнень ютксо вейсэнь тевдеемань ды ялгаксчинь кемекстамонтень. Те иень таштамковсто Н.П. Огарёв лемсэ МГУ-сь совась обществантень, те кармась эскельксэкс региононь отделениянь тееманть туртов, сынь панжозь Россиянь 22 субъекттнэсэ.
«Пек редявикс тев течи топавтови Саранскойсэ. Сюкпря весенень, кие те меленть арсизе-кандызе ды совавтызе эрямос. Россиянь аволь ламо университеттнэсэ улить истят комплекст, кода «Саранск Аренась», сон карми служамо аволь ансяк спортонтень ды шумбрачинтень, истя жо раськеютконь ды общественной вейсэнь тевдеемантень. Минек вейсэнь тевенек экономикасо, гуманитарной тевдеемасо – минек ули меленек: седе ламо Китаень студентт савольть минек сэтьме республикантень, ды научной весемеендонь вейсэнь важодеманть коряс», – мерсь Артём Здунов.
Мордовиянь Прявтось тешкстызе, Мордовиясь арси кастомс Китайстэ экспортонть. Се шкастонть, зярдо аволь ялгаксчинь мастортнэ тусть вейсэнь важодемастонть, ламот енкстнэнь коряс лезксэсь муезель Китайстэ – оборудованиянть, оптоволокнань теемань туртов преформатнень рамамонть коряс. Экономикань кеме сюлмотне лездасть республикантень а киртямс бизнес-ерокчинть.
Казань ошсо Китаень Народной Республикань генеральной консулось Бо Сян тешкстызе, Мордовиясь – Китаенть туртов прявт партнер. «Китаень-Россиянь отношениятнень, партнерстванть ды прявт вейсэнь тевдеемань виевгавтоманть лувсо панжовить покш возможность тынк республиканть ды КНР-нть вейсэнь важодеманть туртов. Россиянь ды Китаень лидертнэ тешкстыть, раськетнень кеме ялгаксчись – те государстватнень ютксо отношениятнень виевгавтоманть туртов виень лисьмапря», – тешкстызе Бо Сян.
Вузось уш ней топавты культурань, наукань ды тонавтомань ламо проектт КНР-стэ партнертнэнь марто вейсэ. Н.П. Огарёв лемсэ МГУ-нь ректорось Дмитрий Глушко тешкстызе, од куншкакуронь панжомась лезды виевгавтомс кавонест государстватнень туртов прявт енкстнэнь, конат лездыть раськетненень седе вадрясто чарькодемс ды марямс вейкень-вейкень.
ОРКД-нь Председателень полавтыцясь, РФ-нь МИД-нь башка кармавтоматнень коряс посолось Кирилл Барский истя жо тешкстызе, Мордовия Республикась сови Россиянь-Китаень стратегической партнерствань виевгавтомань од пельксэнтень.
Фото-выставкатнева экскурсиянть, конат алтазь Россиянь ды Китаень раськетнень ютксо вейсэнь тевдеемань 65 иетненень, истя жо Огарёв лемсэ МГУ-нть КНР-нь тонавтомань ды наукань организациятнень марто вейсэнь важодемантень, инжетнень туртов ветизе Россиянь-Китаень ялгаксчинь Обществань председателень васенце полавтыцясь, Россиянь содавикс китаеведэсь Галина Куликова. «Московось ды Санкт-Петербургось – те вадря, ансяк Россиясо улить истят республикат, кода тынкесь – сюпав ломантнесэ, конат анокт сонзэ кастомс-кепетемс, путыть оймест народной дипломатиянь тевентень. Минек мастортнэнень эряви вейсэндямс вийтнень-бажамотнень – зярдо минь вейсэ, минь мездеяк а пельдяно», – тешкстызе сон.
Мордовия Республикань Прявтонь пресс-службась