Мордовиясь совась сеть регионтнэнь юткс, косо ладявсь социально-политической паро лув. Кемень баллтнэстэ кавксотне лездасть саемс республикантень Россиясо 8 тарка «Петербургская политика» Фондонть те иень мартонь ванкшноматнесэ-тонавтнематнесэ.
Республикасонть молиця тевтненень вадря питненть максомс лездась Мордовиянь Прявтонть Владимир Волковонь Азербайджанонь «EMBAWOOD» мебелень компаниянь прявтонть Тамерлан Куркиев марто вастовомась. Сынь кортасть Саранскойсэ мебелень покш фабриканть панжомадо. Производствась карми молеме «Рабэкс Групп» индустриальной парконть юрсо. Тов арсевить путомс 800 млн целковоень покшолмасо инвестицият.
Мордовиянь Прявтось тешкстызе проектэнть социальной покш смустенть - фабрикасонть теевить зярыя сядот важодема таркат, истя жо ёвтызе региононь экономиканть туртов предприятиянь панжомань эрявиксчинть.
Эзь кадово ванновтомо Куба Республиканть туртов вагононь пачтямонь коряс «РМ Рейл» компаниянь соглашениясь. Контрактонь вешематнень коряс, «РМ Рейл» компаниясь теи Кубанть туртов 225 вагонт, тов истя жо совить 50 хопперт-сахоронь усксемкат, 70 платформат ды 105 вельтязь вагонт. Анок продукциясь карми пачтявомо интермодальной схеманть лувсо: васняяк чугункань кинть ланга, мейле иневеденть трокс. Меельце пурнавксонть Мордовиянь специалисттнэ топавтсызь Гаванань портсонть.
Эштё вейке прявт тевесь, конась совась мартонь рейтингентень, - отходонь башка пурнамонь инфраструктурань доступностенть коряс Саранскоень 1 таркась. Ошонь 80% ламо эрицятне кармить нолдамо контейнертнэнь вторсырьянть туртов. «Россиянь Гринписэнь» эксперттнэ ванкшнызь-тонавтнизь Россиянь 160 оштнень даннойтнень, меельце списоконтень совасть ансяк 89 ошт.
Васенце колмо таркатнень виев регионтнэнь ютксо саизь Калугань областесь, Белгородонь областесь ды Чукоткань автономной округось.