Мордовиясь ванстызе тарканзо социально-политической виевчинть коряс регионтнэнь группанть юткссо. Кемень баллтнэнь эйстэ кавксотне лездасть республикантень саемс 8 тарканть "Петербургская политика" Фондонть февралень ванкшноматнесэ.
Прявт тевтнень юткссо, конат лездасть невтемс покш результат, экспертнэ тешкстызь Саранкойсэ "Кванториум" эйкакшонь технопарконь панжоманть - научно-технической ёнкссонть коряс эйкакштнень дополнительной тонавтнеманть туртов од площадка.
Ютазь иестэнть Мордовиясь совась масторонь 17 регионтнэнь ютксс, конатненень явозь ярмакт эйкакшонь технопарктнэнь теемаст туртов. Те лездась рамамс од оборудования ды теемс зярыя ёнкстнэнь коряс ванкшномань-тонавтнемань туртов лабораторият. Те лазерной технологият, биотехнологият, альтернативной энергетика, роботонь пурнамо, компьютерэнь технологият ды лият.
Республикань Прявтось Владимир Волков кармавтсь промышленной предприятиятнень ды лабораториятнень прявттнэнень ёроковсто важодемс эйкакшонь технопарконть марто, анокстамс тесэ сы шкань кадрат эсест производстватнень туртов. Теде башка, муниципальной районтнэсэ панжовить организациянть филиалтнэ, ламолгавтовить специализациятне.
Эштё вейке прявт тевесь, конась тешкстазь докладсонть, - "Молодежный" бизнес-инкубаторонть панжомась. Сон теезь тевень панжомань шкастонть предпринимательтненень лездамонть туртов ды максы инфраструктурань ды консалтингень услугат. Ушодыця коммерсантнэнень максовить арендас помещеният, конатнесэ путозь IT-оборудования, программань обеспечения, мебель ды оргтехника, истя жо максовить бизнесэнь ветямонть туртов услугат, сынст юткссо консультациянь, бухгалтерэнь ды юристэнь.
Панжомстонзо журналтисттнэнь марто кортамсто, Владимир Волков тешкстызе: "Молодежный" бизнес-инкубаторось карми лездамо IT-сферасонть вишка предприятиятнесэ теезь важодема таратнень ванстомантень ды одтнэнь панжомантень. Эряви покш мель марто ванномс од проекттнэнь. Прявтось, од мельтне-арсематне седе куроксто топавтовольть бизнес-проектнэсэ, конат кармить эрявикст Россиясо ды томбале.
Ютазь ковонь культурань прявт тевесь истя жо эзь кадовт федеральной экспертнэнь ванновтомо. Февралень 3-це чистэ Мордовиянь Прявтось Владимир Волков примась участия Государственной рузонь драмань театранть витнемадонзо мейле торжественной панжомасонть. Сонзэ валонзо коряс, властень институтнэ седе товгак кармить явомо покш мель театрань искусстванть виевгавтомантень. Невтемга, кемекстазь решения явомс 1 млн целковоень покшолмасо 5 грантт творческой проекттнэнень лездамонтень, од постановкатнень путомантень, гастрольтнень анокстамонтень.