Республикань Прявтось ледстизе, тедеде Мордовиясо ушодовсь школатнень педе пев витнемань коряс покш программась, ды те важодемась ули поладозь. Тонавтыцянь тевденть кортамсто, Артём Здунов тешкстызе обществасонть те профессиянть таликанзо касоманть. Сон ледстизе, течи Мордовияв таго сыть Донбассонь эрицят.
«Течи карматано вастомо минек рузонь ломантнень. Карматано лездамо сыненст. Весе неест, эсенектнень минь а каднотано, – тешкстызе Артём Здунов. – Тонавтыцянть эйстэ ашти пек ламось. Самай тонавтыцясь кирвазти эйкакштнесэ содамочитнес бажамонть, ашти невтемакс весемесэ ды свал максы седе ламо сень коряс, мезе путозь школань программантень. Лиси истя, бути минь течи а карматано важодеме минек эйкакштнень марто, тень карми тееме кие-бути лия. Кортамось моли аволь ансяк содамочитнеде, истя жо эрямонть коряс ванновтнеде. Минь нейтяно, кодат тевть молить минек эйстэ овсе аволь васоло. Сеть од ломантне, конат саевтизь тов пряст, эзть пелезеве – тенень сынст тонавтызь тетяст-аваст ды тонавтыцяст. Те тынк таликась. Тынь кастыде-тонавтыде алкуксонь патриотт! Мордовиянтень ули мезень кисэ кирдемс каштанчи. Минек ламо героенек – исень ды течинь героенек. Ды сы шкань героенек. Минь карматано кастомо-тонавтомо эйкакштнень вадря невтевкстнэнь коряс!»
Пелькстамонь республикань этапсонть ерокчист невтизь районтнэстэ ды Саранск ошонь округсто 23 тонавтыцят – муниципальной этаптнень изницятне. Пелькстамонь варчамотнень лувсо кочказь 5 суперфиналистт, конат поладсть пелькстамо Мордовия Республикань сехте вадря тонавтыцянь лементь кисэ. Те:
1. Ольга Бикмаева, Инсаронь 1№ школань историянь ды обществознаниянь уроктнень ветицясь;
2. Мария Елисеева, Орданьбуень енксонь Тургеневань школань химиянь ды биологиянь уроктнень ветицясь;
3. Евгения Макарова, Саранск ошонь «Тавла» тонавтнемань куншкакуронь – 17№ средней школань рузонь келень ды литературань уроктнень ветицясь;
4. Олеся Нораева, Ицялонь школань физикань уроктнень ветицясь;
5. Ирина Семина, Рузаевкань енксонь Тонавтнемань куншкакуронь – 12№ средней школань англань келень уроктнень ветицясь.
Мордовиянь Прявтось явшесь суперфиналисттнэнень дипломт ды ярмаконь премиянть получамс сертификатт.
«Мордовия Республикань Иень тонавтыця – 2022» пелькстамонь изницякс кармась Саранскоень 17№ средней школань тонавтыцясь Евгения Макарова. Сонензэ казезь ледстнемань медаль ды Артём Здуновонь пельде башка казне – телевизор.
«Иень тонавтыця» пелькстамось пешти минек профессиянть од смустнесэ, – тешкстызе сон. – Кодамо тонавтыцянть сехте покш мелезэ-бажамозо? Максомс тонавтницятненень селмот. А мейсэ тонавтыцянть уцясказо? Монь туртов ней – аштемс те сценанть лангсо. Мон велявтан 17№ школантень эсень тонавтницятненень селмо марто ды тонавтсынь сынст ливтнеме».
Пелькстамонь республикань этапонь изницясь невтьсы Мордовия Республиканть те иень ожоковсто Тюмень ошсо «Россиянь Иень тонавтыця – 2022» пелькстамонь финалсонть.
Мордовия Республикань Прявтонь пресс-службась