Артём Здунов тешкстызе те кевкстемань витемань эрявиксчинть: «Федеральной центранть марто важодеманть туртов - минек проекттнэнь кирдеманть лангс яволявтоматнень максоманть коряс - эряви вадрясто анокстамс проектэнь-сметань документациянть, ды шкастонзо получамс госэкспертизань заключениянть. Специализированной институтонть улемась – те эрявиксчи», – тешкстызе региононь руководителесь.
Мордовиянь Правительствань Председателень полавтыцясь Инсаф Хайруллин пачтясь, топавтозь проектированиянь коряс тевтнень молемань весемеендонь ванномась, истя жо кадрань потенциалонть коряс, ваннозь Россиянь регионтнэнь сехте вадря практикатне. «Региононть коряс проектэнь тевтнень вейсэнь питнесь – малав 400 млн целковойть иезэнзэ. Те эрямо таркатнень, китнень строямонь, школатнень ды социальной сферань лия объекттнэнь педе пев витнемань коряс нацпроекттнэнь, федеральной программатнень коряс важодемась», – толковизе республикань Правительствань Председателень полавтыцясь.
Сон евтась зярыя мельть-арсемат кевкстемань витеманть коряс, истя жо Н.П.Огаревонь лемсэ МГУ-нть эли Мордовиянь проектно-изыскательной институтонть специалисттнэнь тердеманть ды материально-технической юронть тевс нолдамонть вельде.
Кортамонть лувсо кепедезель Мордовиянь ды Саранскоень Прявт архитекторонть таркас кандидатуратнень кемекстамонь кевкстемась. Инсаф Хайруллин тешкстызе, те енкссонть важодеманть туртов специалисттнэнень эрявить башка содамочить. Евтазель мель ютавтомс кочкамо «Лидеры строительства» пелькстамонь участниктнень, истя жо Мордовиянь госуниверситетэнь профилень факультетэнь прядыцятнень ютксто.
Артём Здунов евтась мель пшкадемс «Моя Мордовия» пелькстамонь изницятненень. «Прявт архитекторось – специалист, сонзэ экспертэнь ванновтозо карми прявтокс. Региононть туртов башка смусть те канды Мордовиясо строительствань коряс зярыя покш проекттнэнь топавтомасонть», – мерсь республикань Прявтось.
Мордовия Республикань Прявтонь пресс-службась