Якшамковонь 29-це чистэ Московсо важодемань коряс улемстэ Мордовиянь Праивтельствань Председателесь Владимир Сушков Мордовиянь Прявтонть Владимир Волковонь кармавтоманзо коряс вастовкшнось Россиянь спортонь министрань полавтыцянть Павел Новиков марто. Кортамось мольсь «Демография» нацпроектэнть лувсо «Спорт – норма жизни» федеральной проектэнть 2019 иестэ топавтомань невтевкстнэде ды те иентень физической культуранть ды спортонть коряс прявт тевтнеде. 2019 иестэ Мордовиянь ёнкстнэсэ путозь 17 хоккеень коробкат, теезь ГТО-нь тестированиянь 9 куншкакурот, Отяжбуе ёнксонь Сабанцелесэ строязь спортонь панжадо площадка. Кортавсть Федеральной Собраниянтень Россиянь Президентэнть Кучомасонть яволявтозь массовой спортонь ды высшей достижениянь спортонь седе тов виевгавтомань коряс кевкстематнень топавтомась: Мордовиясо теезь лия ёнов а молиця материально-технической база, конань эряви лезэвстэ нолдамс тевс.
Федеральной килангонь агентствань прявтонь полавтыцянть Игорь Костюченко марто вастовомасонть кортамось мольсь Мордовиясо «Безопасные и качественные автомобильные дороги» нацпроектэнть топавтомадонзо. Тешкстасынек, 2019 иентень целевой невтевкстнэ топавтозь, федеральной ды региононь ярмактне нолдазь тевс, витнезь кинь 66 объектт. 2020 иень проекттнэнь топавтомась ашти торгтнень ды контрактнень тешкстамонь лувсонть. Кортавсть регионсонть объекттнэнь строямодост, ютксост Рузаевканть перька кись ды Строительной курованть кись, Саранскоень Северо-Восточной шоссесэнть сэдьтнень строямонть прядомась.