Чадыковонь 7-це чистэ Саранскойсэ ушодызе тевдееманзо «ВМесте» Семиянь академиясь иень перть важодиця од ломанень тонавтомань куншкакурось - Росмолодежинть пельде проектэсь. Куншкакуронь васенце тевекс кармась Пешксесэ аватнень республикань форумось. Площадкась вейсэндинзе Мордовия Республикасто сы шкань 100 седе ламо аватнень, истя жо профилень специалисттнэнь ды эксперттнэнь.
«Вместе» семиянь академиясь – те тонавтомань, культурань ды социальной программатнень вельде семиятненень лездамонь иень перть важодиця площадка. Мордовия Республикасо семиянь академиясонть кармить лездамо од тетятненень-аватненень свалшкань питнейчитнень лувсо эйкакштнень кастомань-тонавтомань кевкстематнесэ, явомо возможносттнень ды лездамонь тевтнень, истя жо совавтомо од ломантнень ды семиятнень общественной эрямонтень. Эрьва ие Куншкакуронь тевтне кармить токшеме 5 тёжадо ламо ломанть. Тедеде семиянь академиянть юрсо ютавтовить 49 мероприятият, иенть прядовомс анокстави специалисттнэнь кадрань резервась, конат важодить семиянь ды демографиянь повестканть марто», – тешкстызе Од ломантнень тевест коряс Федеральной агентствань (Росмолодежинь) руководителесь Григорий Гуров.
Куншкакуронь теемадо ушодксось чачсь мелят «Территория смыслов» форумсонть. Сонзэ ёвтызь участниктне - масторонь эрьва кодамо регионсто од семиятне. «ВМесте» Семиянь академиянь инфраструктурань теемась арсеви Мордовия Республикань Рузаевкань муниципальной енкссо «Надежда» санаториянть юрсо.
Куншкакуронь прявт тевекс карми «Больше, чем путешествие» семиянь туристэнь фестивалесь, конась ютавтови 2026 иень медьковонь 9-12-це читнестэ. Фестивалень участникекс кармить эрьва кодамо иень эйкакш марто 150 ламо од ды ламо эйкакшонь триця семият, истя жо Россиянь келес путешествиянь вечкицят. Регистрациясь панжозь панжиковонь 20-це чинть самс.
Мордовия Республикань Прявтось Артём Здунов, сон вети Государственной Советэнь «Семья» ёнксонть коряс комиссиянть, тешкстызе государственной демографиянь политикань топавтоманть туртов куншкакуронь нолдамонть эрявиксчинзэ:
«Чачтоманть кастомань ды семиятненень, авакс улемантень ды эйкакшпорантень лездамонь коряс тевтнень топавтомась – Россиянь виевгавтомань национальной прявт тевтнестэ вейкесь, конатнень тешкстынзе минек Президентэсь. Мордовиясь уш кемекстызе эсензэ мельга семиянь политикань топавтомань лидерэнь статусонть. Минь нежедтяно те кевкстемантень весемеендо – тейтяно семиянь инфраструктура, витнетяно социальной ды тонавтомань учреждениятнень, келейгавтано эйкакш марто семиятненень лездамонь тевтнень, бизнесэнть марто вейсэ виевгавтано корпоративной демографиянь стандартонть. Росмолодежинть лезксэнзэ вельде теезь «Семья» ёнксонть коряс иень перть важодиця од ломанень тонавтомань куншкакуро – тесэ кармить анокстамо специалистт весе минек масторонть туртов. Тешксэв, васенце тевекс тесэ кармась Пешксесэ аватнень республикань форумось. Истя жо тедеде Мордовиясо ушодови «Семейная столица России» весероссиянь пелькстамось. Минек прявт тевенек – теемс сы шкань аватненень ды эйкакш марто семиятненень лездамонь вадря система, теемс тетятнень-аватнень прявт трендэкс обществасонть. Семиянь центричностесь улезэ эрьва косо ды эрьва мейсэ!»
«ВМесте» Семиянь академиянь площадкасонть ютавтови Форум, конась панжи «Школа счастливой семьи +1» тонавтомань мероприятиятнень, конат аравтозь васенце эйкакшонь чачомантень анокстамонтень ды семиянь практикатнень кемекстамонтень.
Вастовоманть лувсо пурнавозетненень ды сынст семиятненень мереви получамс весемеендонь ветямо: государственной лезксэнь тевтнеде пачтямосто саезь чачтомантень анокстамонть ды ансяк чачозь эйденть мельга якамонтень превспутоматнень видьс. Программантень совить пленарной сессиясь, тематической семинартнэ ды кужинетнесэ вастовоматне, ков сакшныть врачт, психологт ды профилень специалистт.
«Мон сынь форумов чачтомадо ды вишкиненть марто васенце недлятнеде ламо кевкстематнень лангс каршо валонь вешнеме. Мон пек дивазевинь лекциятнень домкачисэст ды советтнэнь практичностесэст кувалма. Сехте лезэвекс кармась Екатерина Деринскаянь потямонь коряс лекциясь, конась лездась монень марямс эсь прянть седе кемевиксэкс!» - ёвтнесь форумонь участникесь Алина Крыжимская.
Площадкасонть анокставить консультациянь таркат социальной сферань ды шумбрачинь ванстомань представительтнень марто, интерактивной лувт, мастер-класст ды тематической таркат. Башка вастовоматне ютавтовить сы шкань аватнень ды тетятнень туртов – психологической анокчинть ды ответственной тетякс-авакс улеманть туртов.
Улемань цётавксокс карми практической содамочитнень ды ёрокчитнень получамось, чачтомадо икеле талномань киртямось, истя жо эйкакшонь чачтомантень анокстамонь башка ёнкстнэнь кемекстамось. Пурнавозетненень мереви ладямс авакс улемань васенце эскелькстнэнь чарькодеманть, а сынст семиятненень – тешкстамс эсь таликаст те шкастонть лездамосо ды тонадомасо.
Форумось истя жо карми сы шкань тетятнень-аватнень вейсэндявксонь пурнамонь таркакс, косо участниктненень мереви ладямс коммуникация, максомс опыт ды получамс седе тов лезкс.
Мероприятиянть арсеви ютавтомс свалшкань лувсо - иезэнзэ кавксть, те лезды ладямс свалшкань важодема од семиятнень сопровождениянть ды регионсонть семиянь институтонь кемекстамонть коряс.
Куншкакуронть тевдеемазо топавтови федеральной уровнясо лезксэнть вельде «Молодежь и дети» нацпроектэнть лувсо, конань операторокс ашти Росмолодежи. Семиянь академиянтень явозь грант программатнень топавтомс 112 000 000 целковойтнень покшолмасо.
Программань анокстыцясь-ютавтыцясь «ВМесте» Семиянь академиясь Од ломантнень тевест коряс Федеральной агентстванть (Росмолодежинть) ды Мордовия Республикань Правительстванть лезксэст вельде.
Источникесь: Росмолодежи