Мордовиясо туристэнь иень цетавкстнэ – республикав экскурсиятнес сыцятне ламолгадсть 30%

Мордовиясо туристэнь иень цетавкстнэ – республикав экскурсиятнес сыцятне ламолгадсть 30%

Ютазь иесь Мордовиянть туртов кармась туристтнэнь ламолгадомань иекс: теезь пурнавомань од таркат туристтнэнь туртов, кассь проекттнэнь ламочись ды вадрячись. Даволковонь 1-це чистэ Республикань Кудосо евтызь 2022 иестэ туризмань коряс цетавкстнэнь ды кортызь сыця шкантень аравтлувтнень. Иенть перть республикасонть ютасть 500 ламо мероприятият, сынст ютксо «Россия – страна возможностей» агентствань «Мастера гостеприимства» пелькстамось, Сабантуесь, «Молодые профессионалы» ды лият. 25 проценттс ламолгадсть отельтнес лотксицятне, 30 проценттс – республикав экскурсиятнес сыцятне. Сехте ламо ломанть яксить С. Д. Эрьзянь лемсэ музеентень, Краеведческой музеентень ды «Эрзянь-мокшонь подворьянтень», П.Г. Смидович лемсэ заповедникентень ды  «Смольный» национальной парконтень.

Республикась лиссь пандемиядо икелень уровнянтень сакшныця туристтнэнь коряс. Кемекстазь Мордовиява туристтнэнь ды экскурсиятнень 55 маршрутт. Сынст ютксо авторской экскурсиятне, региононь ды Россиянь туроператортнэнь маршруттнэ. Мелят Россиянь раськень турмаршрутонь статусось максозь «Зов торамы» оймсемань чинь туронтень. Меельце кавто иетнестэ инвестортнэ республикасонть панжсть оймсемань 7 базат. Те Отяжбуень енкссо «Каменка» пандо прясто сокссо кирякстнемань комплексэсь, Ташто Шайговань енкссо «Акшовская усадьба» оймсемань базась, Кочкурбуень енкссо – «Карнай» оймсемань базась.

Те иентень Мордовиясо туризмань виевгавтомань коряс арсематне сюлмавозь покш мероприятиятнень ютавтоманть ды туристэнь инфраструктурань одкстомтоманть марто. Ламо инжеть – анокстыцятнень-ютавтыцятнень ловомаст коряс 50 тежадо ламо – учовить «Мы вместе!» од ломанень фестивальсэнть ды финнэнь-угрань раськетнень весероссиянь форумсонть, конатнень арсеви ютавтомс республикасонть те иень умарьковсто. Ожоковсто Саранскойсэ ютавтови Событийной туризмань весероссиянь премиянь полуфиналось.

Мордовиясь совась 44 регионтнэнь юткс, конатненень явови лездамонь федеральной грант пляжтнень ды туристэнь раськень маршрутонть вадрялгавтомс – туризмань коряс предпринимательтнень ушодкстнэнень лездамонтень арсеви явомс малав 84 млн целковойть федеральной ярмакт. Кемекстазь стандарттнэнь коряс строявить пляжт – рамави оборудования, снаряжения, инвентарь, экипировка, строявить оймсемань эйкакшонь ды спортонь таркат, ярсамонь пунктт. Кортамось моли пляжсо оймсемань объекттнэде кода Саранск ошонь округсонть, истя жо республикань районтнэсэ. Эсест мелест-ванновтост евтызь Покш Березникень, Ицялонь, Ташто Шайговань, Рузаевкань, Кочкурбуень ды Темниковань енкстнэнь прявттнэ.

Зярыя проекттнэ лездыть вадрялгавтомс инфраструктуранть «Зов торамы» туристэнь раськень маршрутсонть. Оймсемань чинь те турось совавтозь Россиянь раськень маршруттнэнь юткс.

Артём Здунов кармавтсь – совавтомс Мордовиянь туристэнь сетентень весе муниципальной районтнэнь: «Эрьвасонть ули мезе невтемс, ков молемс, улить башка енксонзо – эряви сынст муемс ды теемс туристтнэнь пурнавомань таркакс».

Мордовия Республикань Прявтонь пресс-службась