Апрелень 3-це чистэ «Технопарк-Мордовиянь» ДАТА-центрасо ютавтовсь регионсонть медицинань курок лезксэнь максомань службань диспетчеризациянь автоматизированной информационной системанть вельде услугань теемань презентациясь. Тов сакшность МР-нь Правительствань Председателень полавтыцясь Г.А.Лотванова.
Мероприятиясонть истя жо ульнесть МР-нь здравоохранениянь министрань полавтыцясь Сергей Саушев, «Госинформ» МР-нь ГАУ-нь прявтось Алексей Романов, МР-со «Ростелеком» ПАО-нь филиалонь прявтось Игорь Вольфсон, «ССМП» МР-нь ГБУЗ-нь прявт врачось Дмитрий Якушев ды лият.
Медицинань курок лезксэнь максомань службанть важодемазо, сеедьстэ, сюлмавозь апак учонь зыянов тевень лисемань условиятнестэ куроксто лезксэнь явоманть марто. Секскак службань диспетчеризациянь автоматизированной информационной системанть вельде услугань максомань проектэнть топавтомась редявикстэ киртясы томбавозетненень, сэредицятненень медицинань курок лезксэнь явомань бригаданть самонь, истя жо медицинань сехте малавикс учреждениянтень сынст пачтямонь шканть.
«Мордовиянь Прявтось Владимир Волков МР-нь Госсобраниянтень Кучомасонзо кармавтсь прядомс Ситуационной куншкакуронть тееманть, конась карми ладямо Медицинань курок лезксэнь максомань службанть важодеманзо, - тешкстызе Галина Лотванова. - Проектэсь, конань минь течи невтяно, карми республикасонть здравоохранениянь системань виевгавтомань ды одкстомтомань поладксокс».
Медицинань курок лезксэнь максомань службань диспетчеризациянь важодемань смустесь сеньсэ, весе гайневтематне, истя жо республикань районтнэстэяк, пачтявить диспетчерской вейкине системантень.
Геопозиционированиянь системанть тевс нолдазь, истя жо Медицинань курок лезксэнь максомань бригадатнень улемадо даннойтнень ваннозь, системанть вельде гайневтицянть аштематарканть редязь, лезксэнь мельга икелень пшкадематнень ваннозь, диспетчерэсь прими эрявикс решения ломанентень маласо аштиця бригадань кучомадо. Бути карми эрявомо, кучови специализированной бригада, истя жо примави решения лия регионсто машинань кучомадо.
Од системась лезды домкасто ванкшномс Медицинань курок лезксэнь максомань службань важодеманть (самонь шкась, чинь-вень перть нагрузкась, эрицятнень мелест-арсемаст).
Тешкстасынек, меельце иетнестэ Мордовиясо топавтозь покш важодема здравоохранениянь материально-технической базанть виевгавтомга, специалисттнэнь анокстамга, медицинань неень шкань центратнень теемга. Прядозь колмо уровнянь системань теемась. Медицинань курок лезксэнь максомань службань диспетчеризациянь автоматизированной информационной системань проектэнть топавтомасо - васенцетнень ютксо.
Презентациянть шкасто «теезель» важодемань ситуация, конань коряс теезель гайневтема курок лезксэнь максомань станциянтень. Невтезель системань весе пелькстнэнь важодемань процессэсь ды важодемань таркатне (компьютерэнь, планшетэнь, важодеманть топавтоманзо мельга ваныця потмонь ды ушоёнксонь камерань мониторт). Истя жо участниктне максть питне гайневтемань примиця диспетчерэнть, прявт диспетчерэнть, направлениянь диспетчерэнть важодемантень, гайневтемань примамонь шкастонть таркантень пачкодемантень Медицинань курок лезксэнь максомань бригаданть важодемантень.
Зыянов тевенть лисемстэ, ормалгадомсто Медицинань курок лезксэнь максомань службантень стационарной телефонтнэстэ гайневтема 03 номерэнть вельде, сотовой телефонтнэстэ - 103.