Мордовиясо юты ДНР-нь героенть Равиль Халиковонь лемсэ тхэквондонь коряс регионъютконь турнирэсь

Мордовиясо юты ДНР-нь героенть Равиль Халиковонь лемсэ тхэквондонь коряс регионъютконь турнирэсь

Якшамковонь 29-це чистэ Саранскойсэ панжовсь Донецкой Народной Республикань героенть, Мордовиясо чачозенть Равиль Халиковонь лемсэ тхэквондонь коряс регионъютконь турнирэсь (МФТ-сь). Пелькстамотнесэ примить участия 200 ламо ломанть Россиянь вете регионтнэстэ.

Мордовиянь Прявтонть Артём Здуновонь пельде турнирэнь участниктненень ды инжетненень пшкадсь региононь Правительствань Председателесь Дмитрий Поздняков.

Премьер-министрась евтась сюкпря Равиль Халиковнень, конась ульнесь пелькстамотнень панжомасо: «Тынь од ломантнень туртов мужествань, патриотизмань ды Чачома масторонтень вечкемань алкуксонь невтема».

Мордовиянть туртов тхэквондось – од, ансяк уш спортонь вечкевикс вид. Течи тхэквондонь региононь федерациянтень совить малав 100 ломанть. 2023 иестэ Мордовиясо арсеви ютавтомс 12 мероприятият спортонь те видэнть коряс.

«Кеман, неть пелькстамотне лездыть миненек панжомс ероков спортсмент, конат седе тов кармить вадрясто невтеме минек республикань честенть весероссиянь ды раськеютконь уровнянь пелькстамотнесэ. Арсян участниктненень виде бороцямо ды спортонь уцяска, ваныцятненень – вадря ежо!» – тешкстызе Дмитрий Поздняков.