Якшамковонь 20-це чистэ Республикань Кудосонть панжовсь «ЗаБизнес: рейтинг регионов» предпринимательтнень туртов Весероссиянь конференциясь.
Тосо ульнесть «Платформа для работы с обращениями предпринимателей «ЗаБизнес.РФ» АНО-нь генеральной прявтось Элина Сидоренко, МР-со предпринимательтнень праваст ванстомань коряс уполномоченноесь Елена Юрченкова, бизнес-вейсэндявксонь, контрольно-надзорной ды правань ванстомань органтнэнь представительтне.
Мероприятиясь ютавтовсь ВКС-нь лувсо очно-дистанционной форматсонть. Пурнавозетненень пшкадемстэ Мордовиянь Прявтось Артём Здунов ледстизе, 2022 иесь регионсонть яволявтозь Предпринимательтнень инициативатнень иекс, те невти: поладови властенть ды бизнесэнть сехте панжадо диалогось.
"Кармить ламо мероприятият. Ансяк сехте прявтось - аволь ансяк кортамс кевкстематнеде, а весементь варчамс практикасо. Течи минек те лиси, секс мекс минек вастовомантень састь контролень-надзоронь органтнэ. Минек марто прокуратурась, Внутренней тевтнень министерствась, Следствиянь управлениясь. Бажатано домкасто кортамс весе пшти кевкстематнень. «Забизнес.рф» федеральной платформась лезды предпринимательтненень улемс марязекс ды куроксто получамс эрявикс лезксэнть".
Элина Сидоренко ледстизе, «Забизнес.рф» федеральной платформась нолдазь тевс масторонь Президентэнть Владимир Путинэнь кармавтоманзо коряс. Неень шкане платформасонть тешкстазь 3 тежадо ламо предпринимательть.
"Минь нейтяно, течи Мордовиясь - те регион, конась панжадо предпринимательтнень туртов, нейтяно, ладязь диалог бизнесэнть ды властенть ютксо, кевкстематне, конат аштить предпринимательтнень икеле, витевить. Бизнесэнть марто вастовоматне, конатнень ютавты региононь руководителесь, кандыть покш лезэ", - мерсь сон.
Бути бизнесэнть кармить лепштямо, платформась лезды предпринимательтненень пшкадемс правань ванстомань органтнэнь центральной аппаратонтень. Цифровой платформасонть предпринимательтнень вейкеяк пшкадемась а кадови ванновтомо, а еми, те лезды виень структуратненень чарькодемс, кода важодить регионтнэ.
Мероприятиянть лувсо тешкстазь вейсэнь важодемадо вейсладямо Мордовиянь Правительстванть ды «Платформа для работы с обращениями предпринимателей «ЗаБизнес.РФ» АНО-нть ютксо. Вейсладямот истя жо тешкстазь республикань деловой вейсэндявкстнэнь ды Мордовия Республикасо предпринимательтнень праваст ванстомань коряс уполномоченноенть ютксо.
"Минь арсетяно, предпринимательтне кармить содамо те платформадонть ды нолдамо тевс сеть ресурстнэнь, конат тосо улить", - тешкстызе Мордовиянь бизнес-омбудсменэсь Елена Юрченкова.
Вастовоманть прядовомга, Мордовиянь Прявтось эште весть тешкстызе, бути ули виде диалог, сестэ важодемскак седе шожда - те токши властенть ды предпринимательтнень.
"Прявт принципесь тесэ - а чатьмонемс стакачитнеде, кортамс эйстэст, бизнесэнть ули возможностезэ теемс тень минек вастовомантесэ ды те платформанть вельде", - мерсь Артём Здунов.
Мордовия Республикань Прявтонь пресс-службась