Мордовиянь Прявтонь тевтнень топавтыцясь Артём Здунов умарьковонь 3-це чистэ Московсо вастневсь Россиянь Федерациянь просвещениянь министранть Сергей Кравцов марто. Кортавсть республикасонть тонавтомань системань виевгавтомань кевкстематне.
Важодемань вастовомань кевкстематнестэ вейкесь - школасо андомась. Ледстясынек, неень шкане школасо вадрясто андомань кевкстематнень домкасто ванны Россиянь Федерациянь Государственной Советэнь «Образование» енксонть коряс комиссиясь, конань прявтсо Мордовиянь Прявтонь тевтнень топавтыцясь Артём Здунов. Важодемань группантень совицятне ютавтсть ванномат Россиянь Федерациянь субъекттнэсэ, конат невтизь, прявт тевекс ашти тетятнень-аватнень совавтомась школасо вадрясто андомань коряс ванномантень.
"Те тевенть витеманть туртов эряви теемс панжадо площадка регионтнэнь практикатнень невтемаст туртов. Тень кувалма энялдтанок кирдемс Мордовия Республикань ушодксонть 2021 иень умарьковонь 19-20-це читнестэ регионсонть школасо андомань кевкстематнень коряс Весероссиянь тетянь-авань васенце форумонть ютавтомадо", - пшкадсь республикань руководителесь просвещениянь министрантень.
Важодемань вастовомасонть кортамось мольсь школатнень ды эйдень кужотнень строямодост ды педе пев витнемадост. Истя, Мордовиянь Прявтонь тевтнень топавтыцясь министранть марто кортамсто тешкстызе Саранскойсэ кавто школатнень строямонь эрявиксчинть - «Леруа Мерлен» микшнемань куншкакуронть маласо 600 таркас ды Щорсонть куросо 800 таркас.
Вастовомасонть истя жо кирдезель Мордовиянь ушодксось ютавтомс 2022 иестэ Саранскойсэ Астрономиянь коряс раськеютконь европейской олимпиада.
Мордовия Республикань Прявтонь пресс-службась