Лия енов а молиця скульптордонть ды минек ине земляктонть Степан Дмитриевич Эрьзядо васенце полнометражной документальной-налксемань фильмась нилеце пельксэс ашти налксемань, художественной сценатнень эйстэ. Те Россиянь кинематографсонть васенце истямо картина. Съёмкасонть ульнесть Россиянь содавикс актертнэ - Елизавета Арзамасова, Даниил Спиваковский. Станислав Дужников налксизе скульпторонть тетянзо. Прявт роленть налксизе Эрзянь-мокшонь раськень драмань театрань актерось Павел Михайлов.
Эрзянь-мокшонь культурань ежо ваныцятнень туртов тейсь «Мерема» этнографической фольклорной группась. Инжетнень марто шумбракстнесть картинань теицятне ды Мордовия Республикань Прявтось.
«Течи нейсынек минек ежонть фильманть эйстэ, седе тов, кеман, сон келейстэ карми эскелямо масторонть келес. Степан Дмитриевич Эрьзядо документальной кинонть ламот неизь, а вана налксемань – те мезе-бути од. Темась явовты мель, минек землякось – ломанесь масторлангонь уровнянь, содавикс аволь вейке континентэнть лангсо, – мерсь Артём Здунов. – Минь арсетяно лисемс художественной кинонтень, Мордовиясо карматано виевгавтомо ды кирдеме киноиндустриянть! Минь вечксынек кинонть, вечксынек Степан Дмитриевич Эрьзянь, вечксынек Мордовиянть!»
Минек содавикс землякось ды картинань теицятнестэ вейкесь Станислав Дужников евтась сюкпря Мордовиянь Прявтонтень проектэнь кирдеманть кисэ ды тешкстызе: «Масторлангсонть Эрьзянь содасызь кода ине скульпторонть, минек масторсо жо сонзэ кадызь мельтеме. Кеман, те фильмась явовты мель, седе тов – вечкема Степан Дмитриевич Нефедовонь шкинемантень».
Мероприятиянть шкасто ютавтовсь Мордовиянть кода кинорегиононь презентациясь. Ваныцятне неизь эште кавто фильматнень трейлертнэнь, сынь истя жо снимавсть республикасонть: «Спасая маленькие жизни» ды «Школа Бабы-Яги». «Спасая маленькие жизни» документальной фильмась евтни Республикань эйкакшонь больницянь медиктнень важодемадост ды алтазь больницянь 60 иетненень. «Школа Бабы-Яги» полнометражной фильмань-евксонь премьеранть арсеви ютавтомс те иень кизэстэнть.
Истя жо тешкстасынек, минек республиканть ды «СОЛАР» кинокомпаниянть улить арсеманзо седе тов вейсэнь тевдееманть коряс. Арсеви кундамс «Тайна адмирала Ушакова» полнометражной художественной фильмань съемкатнес, конась карми евтнеме 1812 иень тевтнеде, истя жо нолдамс «Школа Бабы-Яги. Продолжение» фильмань-евксонь омбоце пельксэнть.
Мордовия Республикань Прявтонь Пресс-службась