Мордовиянь Прявтонь тевтнень топавтыцясь Артём Здунов таштамковонь 14-це чистэ вастневсь республикань бизнес-сообществань представительтнень марто. «Вопросы бизнеса: решаем вместе» кевкстеманть коряс кортамось мольсь «Radisson» отелень конференц-залсонть, тей тердезельть Мордовиянь Правительствань, профилень министерстватнень, Саранск ошонь округонь администрациянь, республикань прокуратурань ды налоговой службань руководительтне, Мордовия Республикасо предпринимательтнень праваст ванстомань коряс Уполномоченноесь.
Кортамось мольсь кавто чассто куватьс. Кортавсть ламо кевкстемат, конат токшить бизнесэнь ветямонть кода Саранскойсэ, истя жо республикань районтнэсэ. Вастовоманть прядовомга кемекстазь зярыя тевть, сынст ютксо Импортонтень лездамонь куншкакуронть теемадо, «Агростартап» программанть коряс грантонь получамонь коряс яволявтоматнень максомань цифровой сервисэнть теемадо. Ламот кевкстематне саезь башка ванновт алов.
Мордовиянь Прявтонь тевтнень топавтыцясь тешкстызе, бизнесэнть марто истят вастовоматнесэ эряви куроксто витемс путозь кевкстематнень. "Бути тевесь токши бизнесэнть, административной пирявкстнэнь печтямонть, стака тевтнень витеманть - те тей, тесэ карматано ванномо", - мерсь Артём Алексеевич.
Предпринимательтне, кинь кевкстемаст саезь ванновт алов, вастовомастонть лиссть паро мельсэ.
"Пек кенярдан, ней эсенек стакачитнень марто миненек мереви пшкадемс видьстэ республикань руководителентень - те пек питней, - евтнесь журналисттнэнень башка предпринимателесь Наталья Батраченко. - Минек алашань-спортонь базасонть топавтовить социальной проектт, тенек явовить грантт, ансяк миненек пек а саты мода, кува якавтомс алашатнень. Течи монень алтасть лездамс те кевкстемасонть".
Кемекстазель, предпринимательтнень марто истят вастовомат ютавтомс эрьва кварталсто.
Мордовия Республикань Прявтонь пресс-службась