МР-нь Прявтонь тевтнень топавтыцясь - Мордовиянь пельде «iВолга» ПФО-нь форумонь участниктненень: "Тынь невтевкс ламотнень туртов!"

МР-нь Прявтонь тевтнень топавтыцясь - Мордовиянь пельде «iВолга» ПФО-нь форумонь участниктненень: "Тынь невтевкс ламотнень туртов!"

Таштамковонь 14-це чистэ Мордовиянь Прявтонь тевтнень топавтыцясь Артём Здунов вастневсь Мордовиянь пельде «iВолга» Равчирень федеральной округонь од ломанень форумонь участниктнень ды лидертнэнь марто. Сынь евтнесть региононь руководителентень форумсо улемадонть ды проекттнэде-изницятнеде.

Тедеде минек региононть пельде форумонтень якасть 249 ломанть. Сон ютась 7 сменатнень коряс, сынст ютксо бизнес, наука ды технология ды лият.

Республикань Прявтонь тевтнень топавтыцясь евтась сюкпря од ломантненень важодеманть кисэ. "Монень мельспаро кортамс сеть ломантнень марто, кить мезес бути бажить. Те пек паро, тынь а аштетядо ве таркасо, невтядо эсь прянк пелькстамотнесэ,вешнетядо эсь тарканк. Тынь, апак кавтолдо, сайтядо покш цетавкст! Тынь - невтевкс ламотнень туртов!" - пшкадсь пурнавозетненень Артём Алексеевич.

Грантонь пелькстамонь итогтнень коряс Мордовиянть пельде изницякс кармасть Н.П.Огаревонь лемсэ МГУ-нь аспирантось Олег Лияскин «Термоконтейнеры с вакуумной изоляцией» арсевксэнть марто, истя жо Елена Дерябина «Фото=искусство» проектэнть марто. Неть арсематненень явови лезкс. «Наука и технология» сменань рейтингень лидерэкс истя жо кармась Евгений Дубровин.

Вакуумной изоляция марто термоконтейнертнэнь тееме од ученоесь кармась коронавирусонь пандемиянть шкасто. Проектэнть уш ули патентэзэ. Артём Алексеевич мерсь теемс патент аволь ансяк анок продукциянть, истя жо сонзэ производствань лувонть лангс. Теде башка, разоработканть коряс кулясь максови региононь Минпромонтень.

Роман Ковалев студентэсь пшкадсь региононь руководителентень мель марто ютавтомс грантонь пелькстамо школасо тонавтницятнень туртов. МР-нь Спортонь ды од ломанень политикань министерствантень кармавтозь ванномс школасо тонавтницятнень туртов грантонь пелькстамонь теемадо кевкстеманть.

Мордовия Республикань Прявтонь пресс-службась