Пецясто, якшамковонь 24-це чистэнть, МР-нь Прявтось Владимирв Волков Республикань культурань кудосонть ульнесь кенярксчинь промкс, конась алтазель Мордовиянь автономиянь теемань чистэнть саезь 90 иетнень топодемантень. РДК-нь фойесэнть анокстазельть зярыя выставкат: пурназельть ламо фотографият ды документт, конат ёвтнесть Мордовиянть теевемань историядонзо, неень шкань эрямодонзо ды изнявкстнэде, истя жо анокстазель раськень промыслань сюпав выставка. Минек региононть уцяскадонзо ёвтнесь «Мордовиянтень – 90!» кинофильмась, конась невтезель кенряксчинь промксонтень пурнавозетненень.
Васенцекс сценанть лангсто покш чинть кувалма поздоровт ёвтась Мордовиянь Прявтось Владимир Волков. Сон тешкстызе, 90 иеде икеле эрзятнень-мокшотнень ды минек республиканть эрямосо лиссь покш тев. 1930 иень якшамковонь 10-це чистэ ВЦИК-нь Президиумось кемекстась постановления Мордовиянь автономной областенть теемадо. Республикань Прявтось ёвтызе, ламот иетнень перть эрзятнень ды мокшотнень уцяскаст кеместэ сюлмавозь минек масторонть эрямонзо марто. "Минь свал кирдтянок мельсэнек содавикс ломантнень лемест, кить ламо тейсть тиринь республиканть ды масторонть лезэс, – мерсь Мордовиянь Прявтось. – Те а изнявиця адмиралось, иневанькс праведной воинэсь Фёдор Фёдорович Ушаков, ине скульпторось Степан Дмитриевич Эрьзя, артыцясь Федот Васильевич Сычков, ученоесь Макар Евсевьевич Евсевьев, масторлангонь келес содавикс врачось-офтальмологось Владимир Петрович Филатов, историкесь Василий Осипович Ключевский, поэтэсь Александр Иванович Полежаев, революционной демократось Николай Платонович Огарёв, морыцясь Лидия Андреевна Русланова, XX пингень содавикс философось ды и литературоведэсь Михаил Михайлович Бахтин, татаронь поэтэсь Хади Такташ. Никон Патриархонть ундоксонзо – минек ёнкссто. Минек моданть лангсо эрясь иневанькс Серафим Саровский. Ды ламот ламот лият».
Владимир Волков ледстинзе сеть ломантнень лемест, кить аштесть Мордовиянь теевемань ушодкссо, сетнень, кить ламо тейсть региононь промышленной виевгавтоманть туртов, се шкань велень хозяйствань прявттнэнь, республикань почетонь гражданинтнэнь.
Сюкпрянь башка валт ёвтазельть Ине Отечественной войнань ветерантнэнь, сыре ломантнень, войнань эйкакштнень лемс. Владимир Волков тешкстызе, тедеде тешкставить Ине Изнямонь 75 иетне. Войнась кармась алкуксонь варчавксокс масторонть ды Мордовиянь од республиканть туртов. Минек ёнкссо 100 тёжадо ламо чачозетне казезь орденсэ ды медальсэ, 109-тне – Совесткой Союзонь Геройть, комсь вете ломантне кармасть Славань орденэнь пешксе кавалерэкс.
"Течи Мордовиясь – те эрязасто виевгадыця регионтнэстэ вейкесь. Касыть экономикань, промышленностень, велень хозяйствань невтекстнэ. Топавтозь сядодо ламо покш проектт, панжозь од заводт, теезь малав кемень тежат важодемань таркат", – мерсь республикань Прявтось.
Саранскойсэ важоди оптической волокнань нолдамонь коряс Россиянь келес вейкине заводось. Лезэвстэ важоди Технопаркось. Улить изнявкст фармацевтикасо. Эсенек ды омбо масторонь рынкатнесэ кемекстыть эсест таркаст вагононь теиця, светотехникань, стройматериалонь предприятиятне. Меельце 5 иетнень перть малав ветексть кассь экспортось, минек предприятиятнень продукциясь пачтяви 66 мастортнэс. Мордовиясь саи Россиянь келес васенце тарка вейке ломаненть лангс ловсонь ды алонь нолдамонть коряс, икеле молиця – сывелень нолдамонть коряс.
"Минь покш мель явтанок эрзянь ды мокшонь кельтнень, раськень культуратнень ды койтнень ванстомантень ды сюпалгавтомантень, – мерсь Владимир Волков. – Эрзянь-мокшонь раськень регионъютконь организациянь инекужонтень, конась ютавтовсь Саранскойсэ ютазь иень ожоковсто, сакшность 33 региононь эрицят. Течияк те залсонть – регионтнэстэ эрзянь ды мокшонь диаспорань представительтне. Сюкпря, минек марто вейсэ тынь мелявтадо республиканть уцясканзо кисэ".
Мордовиянь Прявтось ёвтась покш сюкпря республикань весе эрицятнень пельде Россиянь Президентэнтень Владимир Путиннэнь свалшкань явовиця лезксэнть кисэ.
"Течи мон аволь стяко ледстинь ламо лемть. Мордовиясь – те ломанть, минек ютксто эрьвась. Тынк тетянк ды покштянк, тынк эйкакшонк ды нуцьканк. Сынст уцяскасост, изнявкссост ды стакачисэст неяви республиканть историязо. Ломантнень, важодеме вечкеманть, кемевиксчинть, вечкеме ды мелявтомо маштомачинть лангс свал нежедсь ды седе тов карми нежедеме Мордовиясь! – мерсь Владимир Волков. – Миненек ули кинь лангсто саемс пример. Миненек ули мезес бажамс ванды! Покшчи марто, вечкевикс ялгат! Чачома чи марто, минек Мордовия!"
Кенярксчинь промкссонть Мордовиянь Прявтось явшесь государственной покш казнеть. Истя, Россиянь Президентэнть Указонзо коряс здравоохранениясо изнявкстнэнь ды ламо иень перть вадря важодеманть кисэ «Заслуженный врач Российской Федерации» почетонь лемесь максозь Пинямаскин Анатолий Николаевичнень – Республикань 5№ клинической больницянь прявт врачонтень.
РФ-нь Президентэнь Почётной грамотасо казезь: Абросимова Елена Александровна – «Биохимик» АО-нь химико-аналитической лабораториянь прявтось; Бирюков Виктор Степанович – «Талина» компаниятнень группань президентэсь; Елькин Сергей Сергеевич – слесарь-инструментальщик ПАО «Электровыпрямитель» ПАО-нь слесаресь-инструментальщикесь; Попелышев Виктор Александрович – «Восточная» строительной фирмань монтажникесь; Садовникова Галина Михайловна – «Хлебозавод» АО-нь кондитерэсь; Шадрин Александр Павлович – художникесь.
СМИ-нь виевгавтомасо покш изнявкстнэнь ды ламо иень перть лезэв тевдееманть кисэ Россиянь Президентэнь благодарность яволявтозь Ишуткин Николай Ивановичнень – «Чилисема» журналонь прявт редакторонтень ды Лушкин Иван Степановичнень – «Мокшень правда» газетань прявт редакторонтень.
Равчирень федеральной округсо Россиянь Президентэнь Полномочной представителенть Игорь Комаровонь пельде поздоровонь валтнэнь ловнынзе сонзэ полавтыцязо Игорь Буренков. Пачтямосонть кортави, Мордовиясо эрить важодеме вечкиця, эсь тевест вадрясто топавтыця, инжень вастомо маштыця, чевте седей ды панжадо ойме ломанть.
Мордовиянь автономиянь теевемань 90 иетнень кувалма поздоровт кучсь РФ-нь Федеральной Собраниянь Федерациянь Советэнь Председателесь В.И.Матвиенко, пачтямонть лвонызе Федерациянь Советэнь членэсь Владимир Литюшкин.
Кенряксчинь промксонть лувсо поздоровонь валт ёвтасть РФ-нь Государственной Думань депутатось Виктор Кидяев,Пензань областень губернаторось Иван Белозерцев, Татарстан Республикань премьер-министрань полавтыцясь Роман Шайхутдинов, Чувашия Республикань Госсоветэнь Председателесь Альбина Егорова, Председатель Комитета Государственного Собрания – Курултая Башкортостан Республикань Госсобраниянь Комитетэнь Председателесь Владимир Нагорный, раськень тевтнень коряс Федеральной агентствань прявтонть лездыцясь Олег Серёгин ды лият.
Покш чинть кувалма поздоровонь валт кучсть РФ-нь Президентэнь администрациянь руководителень васенце полавтыцясь С.В.Кириенко, РФ-нь Президентэнь администрациянь руководителень полавтыцясь Магомедсалам Магомедов, Санкт-Петербургонь ды Ладожской Митрополитэсь Варсонофий, «Газпром Межрегионгаз» ООО-нь генеральной прявтось Сергей Густов,РФ-нь региононь прявттнэ, ошонь мэртнэ, федеральной структурань ды ведомствань ветицятне.