Середасто, апрелень 5-це чистэ, Мордовиянь Прявтось Владимир Волков примась участия Химиянь коряс школасо тонавтницятнень ютксо Весероссиянь олимпиадань меельце этапонь торжественной пекстамосонть, конась ютавтовсь Саранскойсэ.
Олимпиадасонть примасть участия масторонь 54 региононь тонавтницят - Калининградстонть саезь Приморской ёнксонть видьс. Весемезэ малав 250 участникть, сынст ютксо республикань 13 представительть.
«Мордовиянть ули покш опытэзэ истямо мероприятиянь ютавтомасо. Зярыя иень перть республикасонть ютавтовить физикань, астрономиянь, биологиянь, физкультурань, мирэнь художественной культурань коряс школасо тонавтницятнень весероссиянь олимпиадань финалтнэ. Тедеде химиянь коряс. Те возможностенть максоманть кисэ ёвтан сюкпря Россиянь Федерациянь Образованиянь ды наукань министерствантень, - мерсь МР-нь Прявтось. - Сюкпрянь башка валт ёвтан олимпиадань жюринть лемс. Тов совасть покш учёнойть, эсест тевсэ алкуксонь профессионалт. Покш честь весень минек туртов, жюринть прявтсо Ломоносов лемсэ Московонь государственной университетэнь химиянь факультетэнь деканось, Россиянь наукань академиянь академикесь, химиянь наукань докторось Валерий Васильевич Лунин».
Меельце иетнестэ Мордовиясь саи масторсонок васенце таркат ёроков эйкакштненень лезксэнь явоманть коряс. Школасо тонавтницятне саить покш изнявкст интеллектуальной эрьва кодат олимпиадатнесэ. Ютазь иестэ Весероссиянь олимпиадань меельце этапсонть Мордовиянь тонавтницятне сайсть казнень 45 таркат. Эрицятнень ловозь - те масторонь весе регионтнэнь ютксо омбоце результат. Республикасонть лезэвстэ важоди Ёроков эйкакштнень туртов лицеесь. Омбоце ие сон саи омбоце тарка Россиянь 500 сехте вадря школатнень ютксо.
2015 иестэ лицеень тонавтницясь Иван Утешев Россиянь историясо васенцекс изнясь Астрономиянь ды астрофизикань коряс Мирэнь олимпиадасонть. 6 иетнень перть Раськеютконь предметэнь олимпиадатнесэ весемезэ саезь 130 ламо медальть. Сынст эйстэ 45 сырнень. Изнявкстнэ саевить математикань, физикань, химиянь, биологиянь коряс.
«Содан, тынк ютксто эрьванть туртов ютазь иесь ульнесь аволь шождакс, текень марто лезэнь кандыцякс. Тынь ламо тонавтниде, анокстыде эсенк проекттнэнь, примиде участия олимпиадань региононь пелькстнэсэ. Тынк виде ды стака важодемась максь результатт, - тешкстызе Владимир Волков. - Удалов кадовсть пелькстамонь, теориянь ды экспериментэнь зярыя туронь читне. Арсян, тыненк покш питне максть содавикс эксперттнэ ды наставниктне, теде башка тынь понгиде покш кенярксчинтень, наукань лия енов а молиця мирэнтень. Весе те - покш изнявкстнэс тынк васенцеть ды пек эрявикст эскельксэнк. Олимпиадасо изнямось панжи икеленк вадря возможность масторонь тонавтомань икелев молиця центратнесэ сы шкань тонавтнеманть туртов. Ды се, кикс тынь карматадо, васняяк ашти минек эйстэ. Прявтось, мезес мон тынк кармавтан - илядо стяко ютавто шканть! Тонавтнеде, виевгавтодо содамочинк, бажадо одс!»
Мордовиянь Прявтонть пельде ледстнемань казнеть явшезь жюринтень, истя жо школасо тонавтницятненень ды сынст тонавтыцятненень, кить турнирэнь ютавтомань шкасто тешкстызь чачома чист.
Олимпиадань итогтнень коряс, изницятнень юткс совасть Ёроков эйкакштнень туртов лицеень тонавтницятне - 10 классонь тонавтницясь Анастасия Адайкина ды 9 классонь тонавтницясь Алексей Шишкин. Призёртнэнь ютксо - 10 классонь тонавтницятне Денис Майданов, Анастасия Дектярева, Евгения Ярославцева, 11 классонь тонавтницятне Александр Матвеев, Мария Сайгина, Данила Федотов.