Мордовия Республикань Правительствась ды "МТС" ПАО-сь тешкстасть социально-экономической вейсэнь важодемадо соглашения. Документэнть коряс тешкстазь вейсэнь важодемась зярыя ёнксстнэнь коряс. Кортамось моли региононь телекоммуникациянь инфраструктуранть, социально-экономической вейсэнь проекттнэнь виевгавтомадост.
"Васняяк, "МТС-нть" марто важодемась аравтови Мордовия Республикань телекоммуникациянь инфраструктуранть виевгавтомантень, инновациянь проекттнэнь топавтомантень. Арсетяно, компаниясь карми максомо вадря услугат Мордовиясо аволь вейке таркасо аштиця радиотелефононь связень туртов, истя жо лезды теемс республиканть келес UMTS перспективань стандартонть аволь вейке таркасо аштиця радиотелефононь связень сетнень туртов, GSM стандартонь аволь вейке таркасо аштиця радиотелефононь связень сетнень виевгавтоманть, истя жо нолды тевс од сервист ды услугат.Теде башка, минь арсетяно "МТС-нть" марто вейсэ топавтомс регионсонть социально-культурной проектт, истят кода «Сети все возрасты покорны», «Дети в интернете», «Мобильная библиотека», «Поколение М», - тешкстызе Мордовия Республикань Правительствань Председателесь Владимир Сушков.
"МТС-сь бажи максомс республикань эрицятненень ды предприятиятненень аволь ансяк инновациянь телекоммуникациянь сервист, истя жо обслуживаниянь минек офистнэсэ эрьва кодат услугат: рамамс неень шкань гаджетт, пандомс ЖКХ-нть, теемс ярмаконь пачтямот ды ламот лият. Секскак региононть келес минь аволь ансяк одкстомтано ды келейгавтано сетенть, истя жо виевгавтано эсенек розницанть, те тееви сень туртов, штобу Мордовиянь весе ломантненень, апак вано сень лангс косо сынь эрить, улевельть малавикс тенст эрявикс услугатне. Кеман, "МТС-нть" ды Мордовиянь Правительстванть вейсэнь важодеманть вельде неень шкань технологиятнень коряс меельце изнявкстнэ кармить малавикс республикань эрицятненень ды компаниятненень", - мерсь Мордовиясо "МТС-нь" прявтось Максим Семенов.
2017 иенть перть "МТС-сь" поладсы республиканть келес 2G, 3G ды 4G сетнень виевгавтоманть ды одкстомтоманть, истя жо связень волоконо-оптической линиятнень строямонть. Течи 4G-МТС сетьсэнть 75 Мбит/с скоростесь кунды аволь ансяк региононь прявтошосонть, истя жо Озернойсэ, Луховкасо, Николаевкасо, Ялгасо, Монастырскойсэ, Горяйновкасо ды лия таркатнесэ.