Мордовиянь Прявтось Артём Здунов ацамковонь 2-це чистэ видеосвязенть вельде ютавтсь коронавирусонь инфекциянть профилактикань ды контролень коряс региононь оперативной штабонь промкс. Кортамось мольсь эпидемиологиянь тевтнеде, COVID-19 каршо ливксэнь путомадо, региононь шумбрачинь ванстомань системанть тевдеемадонзо, санитарно-эпидемиологической вешематнень топавтомаст мельга ваномадонть.
Региононь руководителесь тешкстызе, меельце недлястость республикасонть орманть кувалма тевтне пек эзть полавтово: чинь-вень перть редявить 158-159 од сэредицят.
"Минь редятано больницятнес каявицятнень аламодо киртямонть, ансяк 9 муниципалитеттнэсэ 100 тежат эрицятнес ормалгадозетнеде седе ламо среднереспубликанской невтевкстнэнь коряс, - мерсь Артём Здунов. - Киртявить ковидэнь таркатне, ансяк лавшомгадомс а эряви, тевтне полавтовить куш кона шкастонть".
Кода пачтясь Мордовия Республикава прявт санитарной врачось Татьяна Харитонова, башка районтнэсэ, алкукскак, тевтне эште стакат. Ютазь недлястость ламо ломанть ормалгадсть Покш Березникень, Рузаевкань, Ельникень, Краснослободскоень енкстнэсэ ды Саранск ошсо.
Республикань Здравоохранениянь министрась тешкстызе, вадря енов полавтоматне - те ограничениянь тевтнень эрямос совавтомась. "Минь нейтяно, QR-кодтнэнь совавтомась канды лезэ: киртявить ковидэнь таркатне, аволь больничной пневмониятне, киртявить реанимациясо аштицятне, аламолгадыть амбулаторной сэредицятне, - мерсь Олег Маркин. - Ансяк контроленть лавшомгавтомс а эряви".
Инфекциянть каршо бороцямонь тевсэнть прявт енксокс кадови вакцинациясь. Теде башка, эряви пштистэ топавтомс эпидемиянь а нолдамонь весе тевтнень. Тень кувалма Мордовиянь Прявтось кармавтсь Правительствантень витемс Саранск ошсо общественной транспортонь важодеманть марто сюлмавозь стакачитнень.
"Ваннынк, кода яки общественной транспортось. Куватьс учомсто а топавтови социальной дистанциясь, те шкане остановкатнесэ куватьс аштемстэ ормалгадомскак аволь куватьс. Правительствантень эряви витемс те тевень", - мерсь Артём Здунов.
Эпидемиянь а нолдамонь тевтнень топавтомаст мельга ванноманть виевгавтомань од енкстнэде пачтясть Саранск ошонь округонь прявтонь тевтнень топавтыцясь Илья Соколов, Мордовиянь Экономикань, микшнемань ды предпринимательствань министрань тевтнень топавтыцясь Алексей Грибанов, МР-нь Промышленностень, наукань ды од технологиятнень министрась Игорь Губайдуллин.
Оперштабсонть истя жо саизь ванномас бизнес-вейсэндявкстнэнь пшкадемаст, конат токшить общественной ярсамопелень организациятнень важодемаст. Сынь ванновить маласо шкастонть.
Мордовия Республикань Прявтонь пресс-службась