Мордовиянь Прявтонь тевтнень топавтыцясь Артём Здунов таштамковонь 16-це чистэ видеосвязенть вельде ютавтсь коронавирусонь инфекциянть профилактикань ды контролень коряс региононь оперативной штабонь промкс. Кортамось мольсь эпидемиологиянь тевтнеде, COVID-19 каршо ливксэнь путомадо, региононь шумбрачинь ванстомань системанть тевдеемадонзо, санитарно-эпидемиологической вешематнень топавтомаст мельга ванномадонть.
Региононь руководителесь тешкстызе, коронавируссо сэредеманть коряс тевтне стакалгадсть.
"Сави теемс од таркат. Чизэнзэ редявить 67-69 од сэредицят, вете районтнэ совить якстере зонантень, сехте пек талновты се, ломантне ормалгадыть пневмониясо", - мерсь Артём Алексеевич.
Вице-премьерэнь тевтнень топавтыцясь Галина Лотванова пачтясь: меельце кавто читнестэ пневмониясо ормалгадсть 319 ломанть.
"Невтемакс - аштемковсо 10 читнень перть редязь пневмониясо 317 сэредицят, - тешкстызе сон. - Неть тевтне пек талновтыть. Ламолгадсть стационартнэс каязетне. Ютазь понедельникстэ каязь 170 ломанть - те цифрась малавикс якшамковонь ушодовомантень".
Ормалгадозетнень ламолгадоманть кувалма башка теезь эште 130 таркат, республикань 5№ больницясь одс велявтсь ковидэнь госпиталень важодемань лувонтень. Весемезэ республикасонть теезь 1573 таркат лецямонь 10 учреждениятнесэ, чаво таркатне аламолгадыть.
Тешкстазель, ансяк вакцинациясь ды эпидемиянь а нолдамонь тевтнень пштистэ топавтомась лездыть а стакалгавтомс тевтнень.
Мордовиянь Прявтонь тевтнень топавтыцясь ледстизе, кочкамотнень ютавтоманть шкасто эряви пштистэ ванномс сэтьмечинь топавтоманть мельга.
"Ванды весе масторонть келес панжовить кочкамонь участкатне, - мерсь Артём Здунов. - Яводо покш мель профилактикань тевтнень лангс. Пштистэ улест топавтозь Роспотребнадзоронь весе вешематне".
Мордовия Республикань Прявтонь пресс-службась