Артём Здунов тешкстызе, республикасонть орманть коряс тевтне кадовить свалшкань лувсо, чинь-вень перть редявить малав 40 од сэредицят, 260 ломанть лецявить ковидэнь госпитальтнесэ.
«Башка мель ней эряви явомс вакцинациянь кевкстематненень, штобу поладомс иммунизациянть, мельсэ кирдемс кизэнь сыця ковтнень ды эйкакштнень шумбрачист витемань кизэнь оймсеманть. Лагерьтнес кармить пурнавомо 100 ды седе ламо ломанть», – мерсь региононь руководителесь.
Мордовиянь Правительствань Председателень полавтыцясь Галина Лотванова тешкстызе, республикасонть коллективной иммунитетэсь полады киртявомо. «Ней те 48,5%, ковдо икеле ульнесь 60% седе ламо. Васняяк эряви явомс мель ревакцинациянтень – течи регионсонть ревакцинация шкастонзо эзть юта 84 тежат ломанть», – тешкстызе сон.
Тень кувалма МР-нь Шумбрачинь ванстомань министрась Олег Маркин мерсь, ули пелема, неть тевтне ветить коронавирусонь ламолгадомантень. Сон пшкадсь региононь предприятиятнень ды профилень министерстватнень руководительтненень энялдома марто пштистэ ваномс важодицятнень ревакцинациянь шкатнень топавтоманть мельга.
Республикасонть малав 90% эйкакштненень путозь ливкст коронавирусонть каршо. Ней улить эйкакшонь вакцинань 1320 дозат, иммунизациянть эряви поладомс.
Ютамс ПЦР-тестирования, вакцинация ды ревакцинация кармавтозь весененень, кить важодить ЕГЭ-нь ды ОГЭ-нь максомань анокстамосонть, истя жо шумбрачинь витемань лагерьтнесэ ды студотрядтнэсэ.
Тешкстазель, ламо кевкстемат сыть эйдень кужотнесэ мероприятиятнес тетятнень-аватнень понгомадост. Галина Лотванова пачтясь, тонавтомань организациятне панжиковсто улить панжозь тетятнень-аватнень туртов, бути улить топавтозь санитарной ды сэтьмечинь весе вешематне.
Оперштабсонть кортамось истя жо мольсь лемзийтнень эйстэ общественной таркатнень – парктнень, вирень парктнень, оймсемань базатнень - обработкадонть. Муниципалитеттнэнь прявттнэнень кармавтозь виевгавтомс те важодеманть.
Мордовия Республикань Прявтонь пресс-службась