Мордовиянь Прявтонть тевтнень топавтыцясь Артём Здунов панжиковонь 7-це чистэ видео-конференцсвязенть вельде ютавтсь коронавирусонь инфекциянть профилактикань ды седе тов а нолдамонь коряс региононь оперативной штабонь промкс. Кортавсть эпидемиологиянь тевтне, СOVID-19 каршо ливксэнь путомась, оймсема читнестэ региононь шумбрачинь ванстомань системанть тевдеемась, истя жо Изнямонь Чинтень алтазь кенярксчинь мероприятиятнень ютавтомань лувось. Штабсонть кемекстазь решения - панжиковонь 9-це чистэ кенярксчинь салютось карми Саранскойсэ ды Рузаевкасо! Ансяк санитарно-эпидемиологиянь весе вешематнень топавтозь.
Ютазь недлястонть коронавируссо сэредемань статистикась кадовсь икелень лувсо. Чинь-вень перть редявить 28-30 од сэредицят, лецямонь учреждениятнесэ аштить малав 400 ломанть. Малав 1000 ломанть пневмониянь шожда форманть ды ОРВИ-нть марто - лецявить кудосо.
Артём Здунов тешкстызе, ливксэнь путомань кевкстематне пек эрявикст. Течинь чинтень республикав пачтязь вакцинань 132 тежадо ламо дозат, малав 80% сынст эйстэ уш путозь. Маласо читнестэ пачтявить эштё 9600 дозат. Практикась невти, сеть районтнэсэ, косо ероковсто ветяви толковамонь важодемась, косо врачось максы каршо валт ломантнень кевкстемаст лангс, тосо ливксэнь путомась юты пек вадрясто. "Эдь ливксэсь - ормадонть виев ванстома", - тешкстызе региононь руководителесь.
Кода пачтясь МР-нь Правительствань Председателень полавтыцянь тевтнень топавтыцясь Галина Лотванова, аволь аламо сэредицят састь Мордовияв лия регионтнэстэ. Секскак муниципальной образованиятнень прявттнэнень эряви пштистэ ваномс тевтнень мельга, районтнэсэ иляст лисе ормань "кирваземат". Текень пингстэ тешкстазель, рискень группасо те шкас аштить сыре ломантне. Сыненст а эряви якамс покш мероприятиятнес.
Промксонтень пурнавозетне домкасто кортасть Ине Изнямонь тешкстамонь мероприятиятнеде. Кунсолозельть оперативной штабонтень совицятнень мелест, ды кемекстазель решения - Изнямонь Чистэнть ютавтомс салют Саранскойсэ ды Рузаевкасо. Саранск ошонь округонь прявтось Пётр Тултаев пачтясь, кенярксчинь салютось карми 22 чассто, ошонь эрицятне весе районтнэс усковить автобуссо.
Артём Здунов эштё весть ледстизе, республикань прявтошсо ды муниципальной весе районтнэсэ ютавтовиця кенярксчитне улест ветязь Роспотребнадзоронь весе вешематнень топавтозь.
Мордовия Республикань Прявтонть пресс-службась