Региононь руководителесь тешкстызе, федеральной уровнясонть ветяви свалшкань важодема экономикань стабилизациянть коряс. «Россиянь Правительствась полады эрявикс продукциянть масторов ускоманть туртов «пиже коридоронь» тееманть-кемекстамонть, – мерсь Артём Здунов. – А саеви пошлина технологической оборудованиянть, комплектующейтнень, сырьенть ды материалтнэнь ускомсто, бути сынь нолдавить тевс инвестициянь покш проекттнэнь топавтомсто. Васняяк, велень хозяйствасо, обрабатывающей промышленностесэ, строительствасо, транспортонь отраслясо ды IT сферасо».
Кемекстазь решения отраслянь ассоциациятненень нурька шкас максомс полномочият специальной меремань (разрешительной) документациянь анокстамонть коряс. Те шождалгавтсы техникань импортонть ды топавтсы внутренней рынкань вешематнень.
Республикань Прявтось ледстизе: ютазь недлястонть Россиянь Президентэсь Владимир Путин экономикань кевкстематнень коряс промкссонть тешкстызе неень шкане бизнесэнь возможносттнень ламолгавтомань эрявиксчинть. Компаниятнесэ ды предприятиятнесэ ванстови оборотонь средстватнесэ, льготань кредитэнь ресурстнэсэ эрявиксчись. «Те недлястонть минь вастневинек предпринимательтнень марто, прявт тевесь, конадонть сынь энялдыть, – те ванномс банктнень процентэнь ставкатнень», – мерсь Артём Здунов.
Текень пингстэ Мордовиянь Прявтось тешкстызе строямонь отраслянтень лездамонь эрявиксчинть.
МР-нь Экономикань, микшнемань ды предпринимательствань министрань васенце полавтыцясь Иван Горин пачтясь республикасонть федеральной ды региононь лезксэнь тевтнень топавтомадост. Кредитэнь каникулатнень лувсо банктне явсть малав 2,5 млрд целковойть вишка ды средней предпринимательствань 225 субъекттнэнень. Микрокредитования получасть 74 субъектт 125 млн целковойтнень покшолмасо.
Льготань кредитт явозь 160 заемщиктненень, максозь 1,5 млрд целковойть. Региононь лездамонь тевтнень лувсо максозь 83 микрозаймт, вейсэнь покшолмасо 236 млн целковойть.
Регионсонть поладови потребителень рынкасонть молиця тевтнень ванномась, конась ветяви ярсамопелень ды аволь ярсамопелень товартнэнь 52 позициятнень коряс.
Мордовиянь Строительствань ды архитектурань министрась Алексей Гришакин пачтясь строямонь отраслясонть тевтнеде, строямонь материалтнэнь лангс питнетнеде. Панжиковсто банктнесэ ипотекань кредиттнэнь коряс процентэнь ставкатнень валгстоманть кувалма 20% ламолгадсть неть заемтнэнь получамонть коряс яволявтоматне.
«Ней застройщиктне кредитэнь-финансонь организациятнень марто вейсэ анокт максомс эрямо таркань рамамс кредитэнь продуктт, седе вадря условиятнень коряс, конат ульнесть иенть ушодовомсто – 3-6% ды а эряви васенце взнос. Тень кувалма учови, аштемковсто эрямо таркатнень рамамось касы 30-40%», – тешкстызе министрась.
МР-нь Эрицятнень социальной ванстомань, трудонь ды занятостень министрась Игорь Князьков тешкстызе, региононь предприятиятнестэ ламо важодицятнень олякстомадо пачтямот эзть са. Республикасонть улить 1778 вакансият.
Занятостень сферантень государстванть пельде лезксэнь явоманть вельде республикасонть 1596 ломанть эзть кадово тевтеме нурька шкань важодемань таркатнес ютавтоманть вельде. Неть тевтнес региононь важодемань таркатнень максыцятненень явозь субсидият 90 млн ламо целковойтнень покшолмасо. Важодемань таркатнень 66 максыцятне каясть яволявтомат общественной тевтнес 545 ломантнень саемаст коряс. Те лезксэнть вельде регионсонть весемезэ теезь 920 важодемань таркат, явозь федеральной субсидия 46 млн целковойтнень покшолмасо. Региононь вете предприятиятне тонавтыть важодицятнень од тевс, ней тонавтнеманть прядыть 130 ломанть. Важодемань таркатнень максыцятне каясть яволявтомат эште 87 ломантнень тонавтомадост.
Мордовия Республикань Прявтонь пресс-службась