«Течить чинтень груздязь продукциянь покшолмась – 3,2 млрд целковойть, 2021 иенть коряс касомань темпатне – 119%, велень хозяйствань предприятиятнесэ ракшань ды нармунень производствась – 25,3 тежат тоннат, ловсонь – 1,4 тежат тоннат. Прявт капиталонтень путозь инвестициятнень покшолмась кармась 203,7 млн целковойть, касомань темпатне кармасть 110%», – евтнесь Игорь Бутяйкин.
Ней топавтовить инвестициянь истят проектт, кода комбикормонь заводонь строямось (инвестициятнень покшолмаст 1,6 млрд целковойть), истя жо крафт производстванть туртов оборудованиянь рамамось, тосо кармить нолдамо 2 млн коневонь пакетт ковозонзо. Райононь покш ды средней предприятиятнень коряс средней зарплатась – 28,4 тежат целковойть ковозонзо, 2021 иенть коряс касомась кармась 111%.
Игорь Бутяйкин пачтясь нацпроекттнэнь топавтомадост. «Безопасные и качественные автомобильные дороги» проектэнть коряс витневить ниле кить, сыця кавто недлятнестэ подрядной организациясь кунды Рузаевка – Ковылкино – Торбеево кинть одкстомтомантень.
Программанть коряс, конань яволявтызе РФ-нь Президентэсь школань зданиятнень педе пев витнеманть коряс, максозь яволявтома 2023 иестэнть витнемс колмо общеобразовательной учрежденият. «Современная школа» региононь проектэнть лувсо 2022 иестэнть «Точка роста» Тонавтнемань куншкакурот теевить райононь колмо школатнень юрсо. «Успех каждого ребенка» проектэнть коряс тедеде витневить спортивной залтнэ Ковылкинань 3№ СОШ-нть ды Советской Союзонь Героенть М.Г. Гуреев лемсэ Ковылкинань СОШ-нть.
Райононь прявтось евтнесь «Комфортная городская среда», «Экология» ды «Жилье и городская среда» нацпроекттнэнь топавтомадост.
Игорь Бутяйкин токшинзе сеть кевкстематнень, конатнень витемасо районось печти стакачить. Сынст ютксо Ковылкина ош – Краснослободск ош – Ельники веле – Первомайск веле кинть лангсо транспортонь развязканть теемась. 2022 иестэнть максозь яволявтома Россиянь Минтрансонтень госпрограммантень совамодо, арсеви, тешкстазь объектэсь совавтови тов 2023 иентень.
Муниципальной образованиясь истя жо печти стакачить уроз-эйкакштненень эрямонь таркатнень явоманть коряс. 2022 иестэнть максозь кавто квартират эрицятнень те категориянтень, каязь яволявтома эште 5 квартиратнень рамамонть туртов субсидиятнень явомадо.
Теде башка, кортасть общеобразовательной учреждениятнесэ сэтьмечинь топавтомань тевтнеде, истя жо китнень кирдемаст туртов коммунальной техникань рамамодо.
Мордовиянь Прявтось истя жо явсь мель районсонть шумбрачинь витемань кизэнь оймсемань анокстамонь кевкстемантень, мерсь, эряви эрязасто примамс участия «Комплексное развитие сельских территорий» нацпроектэнь тевтнесэ.
Теде башка, тешкстазель, течи районсонть 20 тежадо ламо объектт, конатнень арасть азорост, сынст ютксо велень хозяйствань смустень модат. Артём Здунов кармавтсь райононь руководителентень ютавтомс инвентаризация.
«Те кевкстеманть коряс эряви весементь содамс. Азортомо объекттнэнь эряви нолдамс тевс – те райононь капитал», – мерсь региононь Прявтось.
Мордовия Республикань Прявтонь пресс-службась