Кортавсть пассажирэнь вагонтнэнь проводниктнень резервань тееманть туртов Рузаевкасо участкань панжомань, те специальностенть коряс Мордовиянь эрицятненень важодемань таркатнень максомань кевкстематне, истя жо кизна проводникекс важодеманть туртов студенттнэнь ды школань прядыцятнень саемась.
Марат Асанов толковизе, ней подразделениянтень пассажирэнь составтнес эрявить малав 120 проводникть. «Пенза» вагононь участкась арси Рузаевкань эрицятнень занятостень куншкакуронть марто вейсэ ветямс те профессиянть коряс важодеме бажиця ломантнень кочкамонть, тонавтоманть ды тевень максоманть.
Мордовиянь Прявтось тешкстызе, профессиональной тонавтоманть мереви ютавтомс Рузаевкань чугункань кинь ды ошонь транспортонь техникумонть юрсо, истя жо госпрограмматнень лувсо. Сон истя жо мерсь, студенттнэнень проводникень тевенть нурька шкас максомань кевкстемась ваннови-кортави Россиянь студенттнэнь отрядтнэнь движениянь местной отделениянть марто.
МР-нь Правительствань Председателень васенце полавтыцясь Игорь Фрейдин явсь мель: Мордовиясо эряви теемс «Пенза» вагононь участкань подразделения, конась карми аволь ансяк ладямо пассажирэнь составтнень проводниктнень важодемаст, истя жо карми тееме бригадат «Саранск – Москва – Новороссийск» поездэнть туртов. Тень вельде Мордовиянь эрицятнень туртов максовить 250 ламо важодемань таркат, те лезды ломантненень кадовомс важодеме тиринь регионсо.
Артём Здунов кирдизе те ушодксонть: «Рузаевкасо ули эрявикс весе инфраструктурась, конась целанек топавтсы чугункань кинь участкань тевдееманть, сы шкань важодицятненень лезды получамс специализированной образования. Ванносынек те кевкстеманть вейсэ».
Мордовия Республикань Прявтонь пресс-службась