Мордовиянь Прявтось тешкстызе кортавиця кевкстемань эрявиксчинть ды евтась сюкпря Пётр Колтыпиннэнь банконь представительтнень марто республикань застройщиктнень виде кортамонь возможностенть кисэ.
«Ней минек строямонь промкстнэсэ улить ламо кевкстемат проекттнэнь финансированиянть коряс, – тешкстызе Артём Здунов. – Икеле минек – ошонь строямонь советэсь, тосо кочкавить эрямо таркатнень строямонть туртов участкатне. Кода застройщиктне ванстовить финанстнэнь коряс, кода ладяви банконть марто вейсэнь важодемась – весе те пек эрявикс. Сбербанкось – застройщиктнень финансированиянь лидер, неень шкане республикасонть банкось вети ламо квартирань 11 кудотнень строямонь финансированиянть».
Сбербанконь Волго-Вятской банконь Вице-президентэсь – Председателесь Пётр Колтыпин тешкстызе, Сбербанконть туртов строямонь секторонтень лездамось – прявт тев.
«Тевтне, конатнень путынзе Россиянь Президентэсь эрямо таркатнень строямонь кастоманть-кепетеманть коряс, а лоткавтовить, – мерсь сон. – Се кризисэсь, конантень ней понгсь масторось, уш аволь васенце ды аволь омбоце, ды минь тонадынек сонзэ печтямо. Секскак сеть, кить а лоткить эсь бизнесэнь виевгавтоманть, – сынь печтить кризисэнть ды кастыть эсь потенциалонть. Банконтень истя жо ней аволь шожда, ансяк те тевенть минь печтясынек, вандынь чинтень минь вантано вадрянтень кемезь, карматано эрязасто лездамо Мордовиянь строямонь отраслянтень ды вейкеяк застройщикенть а кадсынек лезкстэме – тень коряс илядо кавтолдо».
Тешкстазель, мелят банкось макссь 2,9 млрд целковойть региононь строямонь проекттнэнь финансированиянтень. Сбербанконь представительтне макссть покш питне республикань важодемантень меельце кавто иетнестэ строямонть лангс максозь мерематнень покшолгавтоманть коряс. «Истят тевтне редявить масторонь аволь эрьва регионсонть», – тешкстызе Сбербанконь Волго-Вятской банконь Недвижимостень финансированиянь управлениянь прявтось Александр Щербаков.
Мордовия Республикань Прявтонь пресс-службась