Прявтось, мезде кортась Мордовиянь руководителесь: «Паксянтень лисить аволь легионерт, а минек цератне, конатнень кисэ кармить «сэредеме», кода икеле – тетятне-аватне ды эйкакштне, мартост важодицятне ды ялгатне, минек велетнень ды оштнень весе эрицятне!»
Лигань васенце сезононть арсеви ютавтомс кубоконь лувсо – васняяк группатнесэ налксематне, мейле плей-офф лувсо виев командатнень редямось. Тевс нолдавить районтнэсэ 18 стадионтнэ, конатнень улить футболонь региононь Федерациянь сертификатост. Турнирэнь финалонь матчтне ютавтовить «Мордовия Аренасо».
Од лигань эрьва матчось карми предприятиятнень туртов, оштнень ды велетнень туртов, косо кармить ютамо турниртнэ, алкуксонь кенярксчикс. Теевиця лигань эште вейке прявт тевесь – лездамс эйкакшонь ды од ломанень футболонтень. Ламот предприятиятне, конат уш анокт примамс участия лигасонть, сайсызь эйкакшонь футболонь командатнень лангсо шефстванть, те лезды рамамс эйкакштненень вадря экипировка, лездамс выездной матчтнень марто, паксятнень кирдемасонть ды эйкакшонь тренертнэнень. Мордовиясь – вейкине регион, косо од ломанень командатнень ули возможностест налксемс стадионсонть, конасонть ютавтовсь футболонь коряс масторлангонь мундиалесь. Теде евтнесь Мордовия Республикань футболонь Федерациянь Президентэсь Александр Егоров.
Мордовиянь Прявтонть арсеманзо коряс, лигань теемань прявт смустесь – республикасонть теемс футболонть алкуксокс «раськень» ды вечкевикс спортонь видэкс. Башка мель сон явсь матчтнень икеле культурань редявикс программань анокстамонть лангс – ютавтомс семиянь кенярксчить, паронь теемань ярмункат, презентацият, волонтертнэнь ды од ломанень организациятнень мероприятият, народно-художественной промыслатнень, сувенирэнь продукциятнень выставкат.
Республикась арси теемс Мордовиянь футболонь лиганть панжадозекс – панжиковонь прядовомс Мордовиянь футболонь Федерациясь карми саеме яволявтомат республикань куш кодамо енксонь командатнень пельде, седе тов – лия регионтнэстэ участниктнень пельде.