«РусГидро» ПАО-сь – Россиянь электроэнергетической сехте покш компания. Минек региононть марто сонзэ сюлми вейсэнь тевдеемась – ансяк мелят Мордовиясто производствань эрявиксчинть туртов корпорациясь рамась продукция 1 млрд целковойтнень седе ламонь питнесэ. Неень шкане кабелень-проводникень продукциянть пачтить «Сарансккабель» ды «Сарансккабель-Оптика». Ладяви вейсэнь важодема «Цветлит» ды «Электровыпрямитель» заводтнэнь марто.
Мордовиясо важодемань коряс улемстэ госкорпорациянь делегациясь примась участия «День поставщика ПАО «РусГидро» VI конференциясонть. Мероприятиясь пурнась 250 седе ламо участникть масторонь эрьва кодат регионтнэстэ. Выставканть лувсо эсь продукцияст ды важодевксэст невтизь Мордовиянь предприятиятне ды организациятне, деловой программанть лувсо участниктне евтнесть региононь промышленной комплексэнь компетенциятнеде ды «РусГидро» ПАО-нь закупкатнень башка енкстнэде.
Вастовоманть шкасто Артём Здунов тешкстызе, мелят «РусГидронть» туртов республикань производительтнень пачтямотнень покшолматне кассть нилексть икеле шканть коряс – те вейсэнь тевдеемань вадря невтевкс, конань мереви кастомс эште.
Компаниянь генеральной прявтонь полавтыцясь евтнесь, делегациясь, конась сась региононтень, невти корпорациянь тевдеемань ламот енкстнэнь. «Сюкпря лембе вастоманть ды Поставщикень чинть пек вадрясто ютавтоманть кисэ. Кортынек республикань производительтнень марто. Ней молиця закупкатнень покшолматне – те ансяк ушодкс. Миненек ули ков эскелямс!» – тешкстызе Александр Чариков.
Вастомасонть истя жо кортасть Петербургонь раськеютконь экономической форумсонть важодемань арсематнеде.
Мордовия Республикань Прявтонь Пресс-службась