Мартонь 4-це чистэ Мордовиянь Прявтось Владимир Волков вастовкшнось "Мордовия" футболонь клубонть прявтнэнь ды налксицятнень марто. Кортамось мольсь клубсонть молиця тевтнеде ды те сезононтень аравтлувдонть.
Командань старшей тренерэсь Марат Мустафин ёвтась сюкпрянь валт республикань прявтонтень клубонть финансонь стакачитнень витеманть кисэ ды тешкстызе сезононь тундонь шкантень налксицятнень вадря анокстамост.
Командань капитанось Евгений Осипов кемевтизе, коллективесь путсы весе виензэ, турнирэнь таблицасонть седе верев куземанть туртов.
Мордовиянь Прявтось тешкстызе, республикань кирдийтне а кадсызь команданть лезкстэме, ансяк клубонть икеле ашти прявт тев: ванстомс Футболонь национальной лигасонть сёрмадстоманть. Владимир Волков тешкстызе, тень коряс сон икеле чистэнть кортась Московсо Россиянь Правительствань Председателень полавтыцянть Виталий Мутко марто.
Региононь Прявтось истя жо явсь мель сень лангс, ваныцятне учить команданть пельде мазый ды кувать шкас мельс кадовиця налксема. "Кодаяк а эряви нолдамс сень, штобу тынк налксемась колаволизе ваныцятнень мелест. Команданть вечкицятне свал марясызь налксицятнень ёжост ды учить футболистнэнь эйстэ алкуксонь налксема. Алкуксонь футболось велявтсынзе ваныцятнень трибунатнес!"- тешкстызе Владимир Волков.
Маласо шкастонть кавто налксематнень "Мордовия" ФК-сь ютавтсынзе кудонь аренасонть. Мартонь 8-це чистэ ютавтови "Сибирь" марто налксемась, мартонь 12-це чистэ - нижнекамскоень "Нефтехимикенть" марто.
"Икеленк - сезононь прявт налксематне. Командантень эряви теемс весементь, ваныцятнень учомаст топавтомга ды невтемга, "Мордовия" футболонь клубось - те команда, конась машты изнямо!" - истямо кармавтома Республикань Прявтось максь клубонь налксицятненень вастовоманть прядовомга.
Мордовия Республикань Прявтонть пресс-службась