Республикасонть нацпроекттнэнь топавтомань коряс промксонть Мордовиянь Прявтонь тевтнень топавтыцясь Артём Здунов ветизе середасто, эйзюрковонь 24-це чистэ. Региононь Минстроень ды МинЖКХ-нь прявттнэ пачтясть топавтозь тевтнеде, кунсолозь сеть муниципальной образованиятнень прявттнэ, косо улить кадовомат тевтнень ушодоманть коряс.

Лангс ливтезель, те шкас беряньстэ моли торгтнень ды контракттнень тешкстамонть туртов документтнэнь анокстамось, седе пек – муниципалитеттнэсэ. Невтемакс, Рузаевкань муниципальной райононь прявтонь васенце полавтыцянть Владимир Чудайкинэнь валонзо коряс, ансяк вейке проектэнть коряс ёвтазь 88 асатыкст, конатнень мейле удалась витемс, ансяк цела ковс покшолгавтозь документтнэнь получамонь шкась. Истят тевть вастневить лия ёнкстнэсэяк. Артём Здунов тешкстызе, нацпроекттнэнь топавтоманть туртов документнэнь вадрясто ды шкастонзо анокстамонь кевкстематне улест саезь башка ванновт алов: «Ильведевкстнэнь кувалма кандови важодематнень ушодовомань шкась ковс эли кавтос, тень нолдамс а эряви!»
Ёвтазель, весе проекттнэнь, конат токшить кудотнень перька таркатнень, парктнень ды сквертнэнь витнеманть-одкстомтоманть, эряви прядомс таштамковонь 1-це чинтень. Муниципалитеттнэнь эрицятне лембе ды коське шкасто максост питне топавтозь тевтненень.

Мордовия Республикань Прявтонть пресс-службась