Кортамонть панжомсто, Артём Здунов ледстизе: ламо ванноматне невтить, эрямонь тарканть коряс кевкстемась - семиятнень пельде эйкакштнень чачтомадо решениянть кемекстамсто прявттнэстэ вейкесь. Масторсонть семиятненень лездамонь прявт тевтнень ютксо - «Семейная ипотека» программась. Сон важоди 2018 иестэ саезь, ды те шканть перть Россиянь эрицятненень максозельть малав 1,5 млн кредитт.
«Семиятнень туртов эрямонь таркань кевкстемась ашти васенце таркасо. Миненек эряви домкасто ванномс семиянь ипотекань условиятнень. Комиссиянтень совицятнень, эксперттнэнь ды регионтнэнь пельде састь ламо каршо валт ды мельть-арсемат», - тешкстызе комиссиянь руководителесь.
Тешкстазель, программантень полавтоматнень совавтомань прявт смустесь – виевгавтомс сонзэ демографиянь ёнксонть. Эксперттнэ, конат невтить масторонь содавикс вузтнэнь ды ванномань-тонавтнемань куншкакуротнень, эсь ёндо, тешкстызь те сферанть марямонзо ды программань параметратнень полавтоматнень тев путовксост семиятнень ёжост ды демографиянь тевтнень лангс.
«Семиянь ипотекась вадрясто важоди масторсонть уш зярыя иеть. Сон пек эрявикс, ды сонзэ эряви ванстомс!» - тешкстызе М.В. Ломоносовонь лемсэ МГУ-нь экономической факультетэнь народонаселениянь кафедрань прявтось Ирина Калабихина.
Кортамонть лувсо участниктне тешкстасть зярыя мельть-арсемат. Весе сынь улить вейсэндязь ды пачтязь РФ-нь Правительствас.
Мордовия Республикань Прявтонь Пресс-службась