Чадыковонь 9-це чистэ Саранскойсэ ютавтовсь регионъютконь строямонь конференциясь. Тосо ульнесть Мордовиянь Прявтонь тевтнень топавтыцясь Артём Здунов, регионтнэнь строямонь министратне, федеральной чиновниктне ды властень органонь представительтне. Мордовиянь прявтошов конференциянтень сакшнось Россиянь Строительствань ды ЖКХ-нь министрань полавтыцясь Дмитрий Волков. Кортамось мольсь аволь ансяк региононь стакачитнеде, истя жо федеральной законодательствасо полавтоматнеде.
Истя, прявт инструментэкс кармась территориятнень виевгавтомань комплексной вейкине механизмась, конась совавозь Федеральной законсонть 2020 иень ацамковонь 30-це чистэ. Те иень эйзюрковсто полавтомат совавтозь республикань законодательствантеньгак. Сынь лездыть Мордовиянтень, кода лия регионтнэненьгак, туемс таркань-таркань строямонть эйстэ эрямо таркатнень строямонь седе покш проекттнэс. Кочказь таркатне – 67 гектардо ламо, тосо арсеви стявтомс эрямо таркань малав 400 тёжат кавонзазь метрат. Од вешематнеде кортась Россиянь Федерациянь строямонь ды жилищно-коммунальной хозяйствань министрань полавтыцясь. «Те законопроектэнть башка ёнкстнэ сюлмавозь сень марто, покш полномочият максозь регионтнэнень ды местной властненень. Икеле истямо зярдояк арасель», - тешкстызе Дмитрий Волков.
Мордовия Республикань Прявтонть пресс-службась