Ожоковонь 22-це чистэ Мордовиясо важодемань коряс улемстэ Россиянь Правительствань Председателень полавтыцясь Дмитрий Чернышенко республикань Прявтонть Артём Здуновонь ды ПФО-со РФ-нь Президентэнь Полномочной представителень полавтыцянть Алексей Кузьмицкий марто вейсэ якась «Оптоволоконные системы» АО-нь. Те Россиясо телекоммуникационной оптической волокнань васенце ды вейкине нолдыця. Кортамось мольсь предприятиянть виевгавтомадонзо, заводонь вийтнень кастомадост (иезэнзэ 4 млн вайгельбетнестэ саезь 10 млн видьс) ды пешксе циклань технологиянть тевс нолдамодонзо.
РФ-нь вице-премьерэсь, Мордовия Республикань Прявтось ды ПФО-со Президентэнь полпредэнь полавтыцясь ваннызь производствань вийтнень. Тесэ арсеви ютамс пешксе циклань технологиянтень - омбо масторонь анокставкстнэ полавтовить эсенек масторонсетнесэ. Те лезды нолдамс тевс Россиянь материалтнэнь масторонь келес покш скоростень интернетэнь ветямонть туртов.
«Оптическое волокно в каждый дом» проектэнть идемадонзо мейле, конась ютавтовсь исяк, Дмитрий Чернышенко эсь сельмсэнзэ неизе масторсонть лиятнень енов а молиця производстванть ды пешксе циклань технологиянть тевс нолдамонть туртов Мордовиясо теезь компетенциятнень.
"Интернетэнь улемась - стратегической 42 ушодкстнэстэ вейкесь, конатнень кемекстынзе масторонь Правительствась. Оптоволокнань нолдамонь пешксе циклантень лисемась - региононть туртов пек эрявикс. Минь вадрясто содасынек IT-сферасонть те материалонь эрявиксчинть, минек икеле аштить покш тевть цифровой трансформациянть коряс, масторсонть сонзэ нолдамось - неть арсематнень топавтомасо прявт пелькс", - мерсь Дмитрий Чернышенко.
Артём Здунов евтась сюкпря РФ-нь вице-премьерэнтень Дмитрий Чернышенконень республикань оптической волокнань миемань рынканть келейгавтомасо Мордовиянтень лезксэнь явоманть кисэ. Течи «Оптиковолоконные Системы» АО-сь саи масторонь рынкань 24%. Предприятиянь арсематнень коряс, иенть прядовомс рынкань пельксэнть арсеви кастомс 30% видьс.
"Миненек эряви ютамс эсенек масторонь материалтнэнь лангс, те импортонь полавтомань кевкстемась, конадонть миненек кортась Президентэсь. Мордовиясо оптоволокнань нолдамонь пешксе циклантень ютамось 90% пекстасы рынкань вешематнень", - мерсь Дмитрий Чернышенко.
Дмитрий Чернышенко кирдинзе зярыя ушодкстнэнь, конат аравтозь сюлмонь сеттнень виевгавтомантень.
"Миненек эряви виевгавтомс оптиволоконной кластерэнть ды ладямс производствань пешксе цикла, туемс омбо масторонь преформатнень эйстэ. Саранскойсэ производстванть теемстэ кастовить нолдавиця продукциянь покшолматне, заводонь вийтне нолдавить 100%, тень пингстэ а карматано аштеме омбо масторонь пачтицятнень эйстэ. Ветявить кортамот сюлмонь прявт оператортнэнь марто вейсэнь важодеманть ладямодо. Россиянь рынкасонть Мордовиянь оптической волокнань пельксэсь свалшкане касозо", -" мерсь Мордовиянь Прявтось Артём Здунов.