Ожоковонь 12-це чистэ Московсо ютавтовсь Россиянь Федерациянь Промышленностень ды торговлянь министранть Денис Мантуровонь ды Мордовиянь Прявтонть Артём Здуновонь важодемань вастовомась. Кортавсть региононь промышленной виевгавтоманть туртов эрявикс проекттнэнь топавтомань кевкстематне.
Вастовоманть ушодовомсто Денис Мантуров тешкстынзе республикань промышленной производствань индексэнь вадря невтевкстнэнь. Истя, невтемакс, те иень якшамковсто-медьковсто индексэнь невтевкстнэ икельдизь икеле иенсетнень.
Промкссонть лувсо кортасть оптической волокнань нолдамонь виевгавтомадонть ды Мордовия Республикасо радиолектронной промышленностесэ промышленной технопарконть теемадо. 2016 иестэнть саезь Саранскойсэ важоди «Оптиковолоконные Системы» АО-сь - Евразийской экономической союзонть келес оптической волокнань вейкине нолдыцясь.
"Минпромторгось кирди Мордовия Республикань Правительствань меленть виевгавтомс ванноманть Россиясо оптоволокнань кабельтнень нолдамонь технологической пелькстнэнь мельга, васенце эскелькстнэнь эйстэ вейкесь, - кабельтнень лангс тешкстнэнь путомась, конат лездыть явомс отечественной продукциянть импортноенть эйстэ", - тешкстызе Денис Мантуров.
Мордовиянь Прявтось мерсь, Россиянь Минпромторгось топавтсь покш важодема нормативной базань анокстамонь ды кемекстамонь коряс, конат аравтозь Россиянь производительтненень лездамонтень. 2021 иень 9 ковтнень перть изнязь ОВС-сэ нолдазь оптической волокнань миемань рекордонь покшолмась - 1,8 млн вайгельбеть, ютазь иенть коряс касомась кармась малав колмоце пелькс. Тедеде отечественной рынкасонть Россиянь волокнань пельксэсь кармась 24%, 2018 иестэнть ульнесь - 9%.
Мордовиясо радиоэлектронной промышленностень сферасо промышленной технопарконь проектэнть арсеви топавтомс кода варчамонь (господдержкань од механизматнень лувсо). Тень кувалма производствась карми молеме «Светотехника» индустриальной парконть юрсо, конань теемась совавтозь 2022-2026 иетнес Мордовия Республикань социально-экономической виевгавтомань программантень. Радиоэлектронной, светотехнической ды суликань промышленностень сфератнень коряс од производстватнень панжоманть туртов арсеви нолдамс тевс «Лисма» заводонь ули-паронть. Теде Денис Мантуров ды Артём Здунов кортасть Министранть республикав важодемань содавтоманть шкасто.
Вастовоманть лувсо истя жо кемекстазь мель ютавтомс Мордовиясо радиоэлектронной промышленностень виевгавтомань кевкстеманть коряс промышленностень коряс Координационной советэнь промкс.
Артём Здунов тешкстызе: умонь шкатнестэ саезь Мордовиясо радиоэлектронной, электротехнической ды светотехнической отраслятне аштить промышленностень прявт енксокс. Республикасонть теезь «Волоконная оптика и оптоэлектроника» кластер, важодить радиоэлектроникань коряс промышленной 10 предприятият, Н.П.Огаревонь лемсэ МГУ-нть анокставить квалифицированной специалистт.
Вастовомасонть истя жо кортасть республикань раськень художественной промыслатненень лездамонь кевкстематнеде. Денис Мантуров кирдизе Артём Здуновонь меленть совавтомс Мордовиянь производительтнень раськень художественной промыслань организациятнень юткс, конатненень явови лезкс федеральной бюджетстэ, истя жо совавтомс региононть «ТЕТРА» варчамонь проектэнтень.
Мордовия Республикань Прявтонь пресс-службась