Эйзюрковонь 9-це чистэ РФ-нь Правительствань Председателесь Михаил Мишустин тешкстась постановления Мордовиясо экономикань башка од зонанть теемадонзо.
«Система» ОЭЗ-сь тееви Саранскойсэ ды Мордовиянь Лямбирень енкссо. Сонзэ резидентэкс кармить котодо аволь седе аламо компаният, инвестициятнень вейсэнь покшолмась - 33,3 млрд целковойть. Теде башка, теевить 775 важодемань таркат.
«Сюкпря кемеманть ды лездамонть кисэ! Те Мордовиянь командань вейсэнь важодемань цетавкс. Россиянь Минэкономразвитиянтень – башка сюкпря ОЭЗ-нь теемасо лезксэнть кисэ», – тешкстызе Мордовиянь Прявтось Артём Здунов.
Экономикань башка зонатне теевить обрабатывающей промышленностень, экономикань высокотехнологичной отраслятнень, туризмань ды портовой инфраструктурань виевгавтомань туртов. ОЭЗ-нь теемась максы бизнесэнтень зярыя башка енкст. Истя, резиденттнэнень мереви нолдамс тевс налогонь льготатнень ды таможенной преференциятнень, истя жо киртявить сиведемань кисэ пандоматне.