Документэнть коряс, РФ-нь Правительствантень Мордовия Республикань социально-экономической виевгавтоманть туртов условиятнень теемга кармавтозь кемекстамс тевть, конат киртясызь Мордовиянь государственной долконть (улезэ бюджетэнь налогонь ды аволь налогонь доходтнэнь 100% аволь седе ламо).
Теде башка, Россиянь Правительствантень Республикань исполнительной властень органтнэнь марто вейсэ эряви кемекстамс 2022-2026 иетнес Мордовия Республикань социально-экономической виевгавтомань программа, ды неть тевтнень топавтомс эрьва иестэ явомс федеральной бюджетстэ 1 млрд целковойде аволь седе аламо.
Туристэнь-агропромышленной кластерэнть теемга Россиянь Президентэсь кармавтсь ванномс лезксэнь явомадо кевкстеманть велень хозяйствань товаронь нолдыцятненень, конат важодить Мордовия Республикасо, шаштомс продукцияст рынкатнес, истя жо Московсо, Санкт-Петербургсо ды Московонь областьсэ. Истя жо анокстамс мельть-арсемат Мордовия Республикасо велень туризмань виевгавтоманть коряс.
Нижегородской областень исполнительной властень органтнэнь лезксэст вельде анокставить ды топавтовить тевть Нижегородской областень «Арзамас – Дивеево – Саров» паломникень-туристэнь кластерэнь прявт маршруттнэс республикань Темниковань енксонь совавтомадо. Те кластерэнь туристэнь прявт маршруттнэсэ витневи кись ды тееви ардома «Санаксарь – Старый Город – Вещерка – Нарышкино – Сатис – Дивеево» маршрутонть коряс, конась вейсэндясы Мордовия Республикань Темниковань енксонть те кластерэнть марто.
Владимир Путин истя жо кармавтсь Россиянь Федерациянь Правительствантень вейсэ «ВЭБ.РФ» виевгавтомань государственной корпорациянть марто кемекстамс тевть, конат лездыть Россиянь Федерациясо нолдавиця оптической волокнанть лангс вешеманть кастомс, покшолгавтомс сонзэ конкурентоспособностенть.