Мордовиянь прявтошсо учреждениясь важоди 1991 иестэ саезь. Сон лезды муемс важодемань таркат эрицятненень ды кочкамс персонал Саранскоень, республикань Кочкурбуень ды Лямбирень енксонь важодемань таркатнень максыцятнень туртов.
2019 иестэ республикась совась варчамонь 16 субъекттнэнь юткс занятостень службань одкстомтоманть коряс, конань лувсо ульнесь неень шкань кадрань куншкакуронь теемась, конась важоди «ванстыця производстванть» лувсо. Весемезэ «Демография» национальной проектэнть коряс одкстомтозь занятостень 150 куншкакурот Россиянь 73 регионтнэсэ.
Явозь ярмактне – те 27 млн ламо целковойтне, Саранскойсэ лездасть целанек одкстомтомс инфраструктуранть, информатизациянь ды автоматизациянь систематнень, важодема таркань вешницятнень ды максыцятнень туртов теезь неень шкань цифровой сервист.
Мордовиянь Прявтось Артём Здунов ды Россиянь Трудонь ды эрицятнень социальной ванстомань министрась Антон Котяков ваннызь одкстомтозь куншкакуронть, макссть питне тевс нолдазь сервистнэнь важодемантень.
Ванноманть лувсо тешкстазель, целанек полавтозь государственной услугатнень явомань лувось. Ней куншкакуронь сотрудниктне явить эрицятненень лезкс эрямонь ниле тевтнень коряс: «аватненень, кинь улить школав а якиця эйкакшост, важодемань таркань муемасо лездамось», «од ломантненень важодемань таркань муемасо лездамось», «предпринимательствантень лездамось», «50 иесэ ды седе сыре эрицятненень важодемань таркань муемасо лездамось». Важодемань таркатнень максыцятненень явовить услугат ниле тевтнень коряс: «производствань одкстомтомась», «бизнесэнь сопровождениясь», «важодицятнень кочкамось» ды «сезононь важодематне».
Тесэ жо важодемань таркатнень максыцятненень ды республикань эрицятненень мереви вешнемс важодема эли кочкамс важодицят «Работа России» Вейкине цифровой платформанть вельде.
Россиянь Трудонь ды эрицятнень социальной ванстомань министрась Антон Котяков тешкстызе, меельце иетнестэ ведомствась башка мель яви субъекттнэсэ важодемань вешнемасо лездамонть виевгавтомантень. «Весе масторонь келес занятостень государственной куншкакуротнень 10 тежат сотрудниктне ютасть одс тонавтнема. Тешкстаса, «Демография» нацпроектэсь лезды аволь ансяк одкстомтомс физической инфраструктуранть, истя жо – сехте прявтось – тонавтомс специалистт, анокстамс квалифицированной кадрат ды карьерной консультант. Ней Мордовиясо важоди занятостень флагманской куншкакуро, конась лади весе стандарттнэнень ды вешематненень», – мерсь сон.
Антон Котяковонь валонзо коряс, одкстомтозь истят куншкакуротнесэ седе куроксто кочкить персоналонть, явить седе вадря услугат. Бути занятостень свалшкань куншкакуросонть иень перть лездыть муемс важодема 3,7 тежат эрицятненень, одкстомтозь куншкакуросонть – 7 тежат ломантненень. Трудонь локальной рынканть туртов седе покш лезэвчинть туртов кемекстазь решения седе тов ютавтомс субъектсэнть занятостень государственной службань системань одкстомтоманть комплексной лувсо. Васенце 17 регионтнэ уш кармасть комплексной одкстомтомань коряс пилотонь участникекс. Арсеви, Мордовия Республикась вейсэндяви проектэнтень 2024 иестэ.
«Минь понгинек стака шкас пандемиянть пингстэ: эрявсь куроксто лездамс ломантненень, конатнень бизнесэст цють эзь стя. Республикасонть 1500 ломантне тонавтнесть нурька шкань специальносттнес, 1000 - общественной тевтнес, 1300 ломанть минь тонавтынек гарантированной важодемань таркатнень туртов. Весе тень минь теинек вейсэ, Россиянь Трудонь ды эрицятнень социальной ванстомань министерствань программатнень коряс. Покш сюкпря лездамонть кисэ, поладсынек вейсэнь важодеманть», – тешкстызе Мордовиянь Прявтось Артём Здунов.
Мордовия Республикань Прявтонь пресс-службась