Кавто этажонь социальной учреждениясь строязь «Демография» нацпроектэнть лувсо, панжозь ютазь иень ацамковсто ды теезь 100 ломаньс.
4 тежадо ламо кавонзазь метрань покшолмасо социальной объектэнь строямось ветявсь 2020 иестэ саезь. Сонзэ стявтомс ды оснащенияс ютавтозь 304 млн ламо целковойть, сынст эйстэ 298 млн – федеральной бюджетэнь ярмакт.
Комплексэнть совасть – котельной, толонь мадстемань насосонь станция ды ванськавтомань сооружения.
Учреждениянть перька таркасонть теезь весемесь сыре ломантнень оймсемаст туртов – киштемань площадка ды ушонь тренажер марто спортонь комплекс, настольной теннисэнь ды оймсемань туртов площадкат.
Ней тесэ эрить 49 ломанть, сехте сырентень 94 иеть. Учреждениясонть весемезэ 54 эрямонь нупальть, васенце этажсонть эрить пенсионертнэ, конатненень стака якамс. Пансионатонь весе эрицятнень туртов важоди общей практикань врач, улить физиотерапевтической процедурат, ломантень андыть, важоди библиотека.
Мордовиянь Прявтось Артём Здунов ды федеральной ведомствань руководителесь Антон Котяков ваннызь нупальтнень, конатнесэ эрить сыре ломантне, истя жо медицинань персоналонь нупальтнень ды учреждениянь оборудованиянть. Тесэ теезь условиятне ладить кудонсетненень. Нупальтне вадрят, эрьвасонть телевизор, санузел. Холлтнэсэ чевте дивант-креслат, хозяйственной ды пидемань-панемань нупальтнесэ – од бытовой техника.
Инжетне варштасть чаень симемань нупалентень. Валске ланга чаень симемась – свалшкань кой, тесэ ули кухнянь весе техникась ды посудась, нетемакс, пачалксетнень панеманть туртов. «Сюкпря пек вадря условиятнень кисэ. Кодамо здания минек туртов строясть!» – евтызь мелест од интернатонть кувалма сыре ломантне.
Ваннызь инвалидтнэнь туртов башка нупальтнень, косо весемесь теезь а якиця эрицятнень туртов, ули экстренной тердемань лепштямо. ЛФК-нь нупальсэнть ютавтовсь зарядка, инжетне кортасть врачтнень марто эрявикс медпрепараттнэнь улемадост, Антон Котяков неизе, весемесь ванстови эрявикс условиятнесэ.
Башка мель явсть пищеблоконь ванномантень – покш валдо нупаль, од мебель ды неень шкань кухнянь од оборудования марто.
Соцработникень нупальсэнть инжетненень евтнесть, социальной услугатнень эрьва получицянть коряс пешксе кулясь совавтозь региононь электронной регистрантень – тесэ эрьванть лангс личной тевесь ды социальной программась. Соцработникень прявт тевесь – ладямс сюлмот тесэ эрицятнень малавиксэст марто. Ламотненень малавиксэст сеедьстэ сакшныть инжекс, тень туртов теезь весе условиятне.
Социальной од учреждениясонть явови эште вейке услуга – чинь стационарсо улемась. Райононь сыре ломантне, сынст марто тешкстазь специальной конрактт, эрьва чистэ пачтявить интернатонтень эрьва кодамо тевдееманть туртов. «Мезе тесэ теить? Викшнить, стыть, кодыть, теить зарядка, морыть», – толковизь соцработниктне.
«Серебрянка» ансамблясь ютавты репетиция, штобу кенярдовтомс ялгатнень концертэнь программасо. Эряви тешкстамс, дневной стационарс пачтямонть туртов транспортось явозь учреждениянтень «Старшее поколение» проектэнть лувсо – кавто «ларгустнэ» эрьва чистэ пачтить сыре ломантнень интернатов.
Мордовия Республикань Прявтонь пресс-службась